მაია ბითაძე 26 მაისზე: ეროვნული დღესასწაული აღინიშნება ისე, როგორც დამოუკიდებელ სახელმწიფოს შეეფერება, ეს არის ის დღე, რომლის დაჩრდილვას ვერანაირი რადიკალიზაცია ვერ შეძლებს

 ეროვნული დღესასწაული აღინიშნება ისე, როგორც დამოუკიდებელ სახელმწიფოს შეეფერება. ამასთან დაკავშირებით, როგორც პრემიერ - მინისტრის განცხადება იყო, ასევე, ჩვენი გაცხადებული პოზიცია, რომ ეს არის ის დღე, რომლის დაჩრდილვას ვერანაირი რადიკალიზაცია ვერ შეძლებს, - განაცხადა გადაცემაში „იმედი LIVE“ პარლამენტის გარემოს დაცვისა და ბუნებრივი რესურსების კომიტეტის თავმჯდომარემ მაია ბითაძემ 26 მაისის დღესასწაულთან დაკავშირებით ოპოზიციის ნაწილის დაანონსებულ რადიკალურ ქმედებებთან დაკავშირებით.

მისი თქმით, ყველასთვის ცნობილია, რა სურს ოპოზიციას, თუმცა ქვეყანაში დესტაბილიზაციას ხელისუფლება არ დაუშვებს.

„რა სურს რადიკალურ ოპოზიციას, ეს ძალიან კარგად გახმოვანდა იმ მესიჯებში, რომელიც რამდენიმე პოლიტიკოსმა გააჟღერა და პრაქტიკულად პირდაპირ მოუწოდა საქართველოს მოსახლეობას თავგანწირვისკენ, მათ შორის სიცოცხლის დათმობისკენ. და გაურკვეველია, რისთვის ათმობინებენ ამ ადამიანებს სიცოცხლეს, როდესაც პირველად, ამდენი წლის განმავლობაში საქართველოში გვყავს ხელისუფლება, რომელმაც შეინარჩუნა მშვიდობა, რაც მათთვის ქილიკად ქცეულ ტერმინად არის გადაქცეული. პირველად გვყავს ხელისუფლება, რომელიც ცდილობს, რომ ამ ქვეყნის ეკონომიკა წაიყვანოს აღმავალი გზით, რაც ძალიან მნიშვნელოვანია, მათ შორის საერთაშორისო სამართლებრივი ურთიერთობების გათვალისწინებით და იმის გათვალისწინებით თუ როგორია დიდი სახელმწიფოების ინტერესი ეკონომიკურად ძლიერი სახელმწიფოების მიმართ. მათ შორის იმ დერეფნის გათვალისწინებით, რასაც ჩვენ „შუა დერეფანს“ ვუწოდებთ, რომელიც ზუსტად ამ დიდი სახელმწიფოების ინტერესის საგანია. და ეს ადამიანები გვიბიძგებენ იმისკენ, რომ რაღაც რადიკალიზაცია მოვახდინოთ, ახალი სპექტაკლები დავდგათ, ადამიანებმა ერთმანეთი დააზიანონ“, - განაცხადა მაია ბითაძემ.

კითხვაზე: მოსალოდნელია თუ არა სიტუაციის გამწვავება, მაია ბითაძე აცხადებს, რომ თავად ოპოზიციაშივე არის აზრთა სხვადასხვაობა 26 მაისის რადიკალიზაციასთან დაკავშირებით.

მისი თქმით, ოპოზიციას არაფერთან მიმართებით არ აქვს გეგმა. მათი ერთადერთი მიზანი რადიკალიზმია და შემდეგ რა იქნება არ აინტერესებთ.

„არ ველოდები [სიტუაციის] გამწვავებას. რადიკალურ ოპოზიციას არც ერთიანი მიზანი აქვს, არც ერთიანი ხედვა არ აქვს. ერთი რამ სურთ ამ ადამიანებს, რომ ძალადობრივი გზით, არეულობით, უბედურებით ამ ქვეყანაში ქაოსის და აპოკალიფსის სცენარის განხორციელებით დაამხონ ხელისუფლება. და შემდგომ სულ ერთია რა მოვლენები განვითარდება. მათ არ აქვთ გეგმა და არც ჰქონიათ გეგმა. ახლა რაღაც საბავშვო ბაღის თამაშს ვთამაშობთ, ტელეფონებით არჩევნების ჩატარების კომიკურ მესიჯებთან მიმართებით“, - განაცხადა მაია ბითაძემ.