მაკა ბოჭორიშვილი აშშ-სთან ურთიერთობაზე: ჩვენთვის ის რჩება სტრატეგიულად მნიშვნელოვან პარტნიორად, მნიშვნელოვანია ასევე ჩვენც გვქონდეს გარკვეული სიცხადე, თუ როგორ უყურებს ამერიკის ახალი ადმინისტრაცია საქართველოსთან ურთიერთობებს

ჩვენთვის ის რჩება სტრატეგიულად მნიშვნელოვან პარტნიორად და რა თქმა უნდა, მნიშვნელოვანია ასევე ჩვენც გვქონდეს გარკვეული სიცხადე, თუ როგორ უყურებს ამერიკის ახალი ადმინისტრაცია საქართველოსთან ურთიერთობებს, - განაცხადა გადაცემაში „იმედი LIVE“ საქართველოს საგარეო საქმეთა მინისტრმა მაკა ბოჭორიშვილმა აშშ-სთან ურთიერთობაზე საუბრისას.

მისივე თქმით, საქართველოს ხელისუფლება მოელის სტრატეგიულ პარტნიორობას და არა „მეგობარი აქტის“ ჩარჩოში განსაზღვრულ იმ ურთიერთობების საფუძველს, რომელიც წარმოუდგენია „მეგობარი აქტის“ ავტორს.

„ამერიკის შეერთებულ შტატებთან ურთიერთობებს რაც შეეხება, ჩვენმა საზოგადოებამ და არა მხოლოდ ჩვენმა საზოგადოებამ ნახა ღია წერილი, რომელშიც ძალიან კარგად არის მოცემული თუ რა გვსურს ჩვენ ამერიკის შეერთებულ შტატებთან ურთიერთობაში, რას მოველით ამერიკის შეერთებული შტატების ახალი ადმინისტრაციისგან და რა არის, ზოგადად, ჩვენი ხედვა როდესაც ვსაუბრობთ ამერიკის შეერთებულ შტატებთან ურთიერთობებზე. ეს არის ის, რომ საქართველოსთვის მნიშვნელოვანია ამერიკის შეერთებულ შტატებთან ურთიერთობები. ჩვენი გადაწყვეტილება არ ყოფილა სტრატეგიული პარტნიორობის შეჩერება. ჩვენთვის ის რჩება სტრატეგიულად მნიშვნელოვან პარტნიორად და რა თქმა უნდა, მნიშვნელოვანია ასევე ჩვენც გვქონდეს გარკვეული სიცხადე, თუ როგორ უყურებს ამერიკის ახალი ადმინისტრაცია საქართველოსთან ურთიერთობებს.

მე მქონდა არაერთი კომუნიკაცია ამერიკის შეერთებული შტატების ელჩთან. მათ შორის, ბოლო კომუნიკაციას ესწრებოდა ასევე ვაშინგტონიდან წარმომადგენელი, სახელმწიფო დეპარტამენტიდან და მასაც ჰქონდა შესაძლებლობა ენახა ის შეხვედრა და ყოფილიყო მონაწილე ამ შეხვედრის. ძალიან მნიშვნელოვანია ერთი რამ, რა თქმა უნდა, საელჩო წარმოადგენს ქვეყანას და ქვეყნის ინტერესებს, რაც არაერთხელ ხაზგასმით აღნიშნა ქალბატონმა ელჩმა და ერთი რამ არის კიდევ მნიშვნელოვანი, საელჩო და ელჩი რამდენად ხელს უწყობს ორ ქვეყანას შორის ურთიერთობების გაძლიერებას. როდესაც ჩვენ ვნახეთ წინა ადმინისტრაციის პირობებში იმგვარად განვითარებული ურთიერთობები, როგორც განვითარდა საქართველოსა და აშშ-ს შორის, მაშინ, როდესაც ახალი ადმინისტრაციის პირობებში საქართველო გამოხატავს იმედს, ინტერესს და მზაობას, რომ ეს ურთიერთობები გამოსწორდეს, ეს ურთიერთობები გადაიტვირთოს პოზიტიურ კონტექსტში, რა თქმა უნდა, ხელის შემშლელი ფაქტორები არ უნდა იყოს ამასთან დაკავშირებით და დიპლომატმა არ უნდა შეასრულოს პირიქით, უარყოფითი როლი ამ შემთხვევაში. უნდა იყოს ხელის შემწყობი ამ პროცესის.

ჩვენ მოველით, რომ ფიქრის პერიოდი დასრულდება სახელმწიფო დეპარტამენტში თუ ამერიკის შეერთებულ შტატებში და ჩვენ ვნახავთ უფრო მეტ სიცხადეს. სამწუხაროდ, ამ დრომდე, ისიც უნდა ვთქვათ, მიუხედავად იმისა, რომ კონგრესის მიერ მიღებული „მეგობარი აქტი“ ერთგვარად ასე იყო მოწოდებული, რომ ეს თითქოს არ არის აღმასრულებელი ხელისუფლების პოზიცია და ეს არ არის სახელმწიფო დეპარტამენტის პოზიცია, შეიძლება ასეც მივიღოთ, თუმცა, მეორეს მხრივ, ეს არის ერთადერთი დოკუმენტი, რომელიც ჩვენ ვნახეთ საქართველოსთან დაკავშირებით, რაც ბოლო პერიოდში განიხილა ამერიკის შეერთებული შტატების კონგრესმა და მოელის სენატში განხილვებს. რა თქმა უნდა, ჩვენ აუცილებლად უნდა გვეთქვა, რომ ის მცდელობა, რაც არის „მეგობარი აქტით“, რომ ეს იყოს საფუძველი ორ ქვეყანას შორის ურთიერთობებისთვის, ჩვენთვის არ არის მისაღები.

ჩვენთვის „მეგობარი აქტი“ არ არის „მეგობარი აქტი“ და არ არის მეგობრობის შესახებ. რა თქმა უნდა, ჩვენ ეს უნდა დაგვეფიქსირებინა და ჩვენ ეს დავაფიქსირეთ. ჩვენ მოველით სტრატეგიულ პარტნიორობას და არა „მეგობარი აქტის“ ჩარჩოში განსაზღვრულ იმ ურთიერთობების საფუძველს, რომელიც წარმოუდგენია „მეგობარი აქტის“ ავტორს“, - აღნიშნა მაკა ბოჭორიშვილმა.