შალვა პაპუაშვილი „ჯარის ბანაკის“ გახსნის საზეიმო ცერემონიალზე სიტყვით გამოვიდა

საქართველოს პარლამენტის თავმჯდომარე შალვა პაპუაშვილი გიორგი ანწუხელიძის სახელობის სერჟანტთა აკადემიის ტერიტორიაზე „ჯარის ბანაკის“ გახსნის საზეიმო ცერემონიალზე სიტყვით გამოვიდა.

„მას შემდეგ რაც ჩვენ დამოუკიდებელი ქვეყანა გავხდით, რა თქმა უნდა, ჯარის თემატიკა განსაკუთრებით მნიშვნელოვანია. მით უმეტეს, იმ ქვეყნისთვის, რომელსაც ასეთი საამაყო სამხედრო მოსამსახურეები და ჯარი ჰყავს, რომელმაც არაერთხელ დაამტკიცა, რომ ქვეყნის ინტერესების და მოსახლეობის დასაცავად მზად არის.

დღევანდელ სამყაროში მარტივია მიიღო სხვადასხვა სახის განათლება, თუმცა ყველაზე მნიშვნელოვანია ის ფასეულობები, რომელიც თითოეულმა მოზარდმა უნდა შეიძინოს. ამ ფასეულობებს შორის უპირველესია პატრიოტიზმი - სამშობლოს სიყვარული. რა თქმა უნდა, ამ ფასეულობების შეძენას სჭირდება თავისი გარემო და სად, თუ არა ჯარში არის ის გარემო, სადაც შეგიძლიათ შეიგრძნოთ პატრიოტიზმის სიყვარულიც და ტვირთიც. სამშობლოს სიყვარული დიდ პრივილეგიასთან ერთად უდიდესი პასუხისმგებლობაც არის, ამიტომ გისურვებთ „ჯარის ბანაკში” საინტერესო დღეების გატარებას“, - მიმართა შალვა პაპუაშვილმა ახალგაზრდებს.

ღონისძიების მონაწილეებს სიტყვით აგრეთვე მიმართეს: საქართველოს პრეზიდენტმა მიხეილ ყაველაშვილმა, პრემიერ-მინისტრმა ირაკლი კობახიძემ და თავდაცვის მინისტრმა ირაკლი ჩიქოვანმა. ღონისძიებას საქართველოს პარლამენტის და მთავრობის წარმომადგენლები ესწრებოდნენ.

საქართველოს პრეზიდენტმა, პრემიერ-მინისტრმა, პარლამენტის თავმჯდომარემ, თავდაცვის მინისტრმა და თავდაცვის ძალების მეთაურმა ბანაკის სასწავლო ინფრასტრუქტურა დაათვალიერეს.