"იტალიაში ბინას ვერ ვქირაობ, რადგან უცხოელი ვარ"

იტალიაში დაბადებული, წარმოშობით ეგვიპტელი ტასნიმ ალი, პირად „ინსტაგრამ“ გვერდზე წუხილს გამოთქვამს, რომ საკუთარი წარმომავლობის გამო, ბინის დაქირავებას ვერ ახერხებს. ტასნიმი არეცოში დაიბადა და რომში ცხოვრობს, მაგრამ ძალიან უჭირს იმ რეალობასთან შეგუება, რომელშიც აღმოჩნდა. გოგონას თქმით, როგორც კი უძრავი ქონების აგენტი, ან ბინის მეპატრონე მისი უცხოური წარმომავლობის შესახებ იგებს, საქმე წინ აღარ მიდის.

„სანამ აგენტს ჩემს სახელს და გვარს არ ვეტყვი, მანამდე ყველაფერი კარგადაა და ბინაც თავისუფალია, მაგრამ საკმარისია გვარი გაიგონ, მომენტალურად აღმოჩნდება ხოლმე, რომ ბინა გაქირავებულია. გარდა ამისა, „ვოთსაფიდან“ ჩემი ფოტოს წაშლაც მომიწია, რომელზეც ჩადრით ვიყავი, რადგან მესიჯებზეც კი არ მპასუხობდნენ“.

იქიდან გამომდინარე, რომ მსგავსი ფაქტი ერთეული შემთხვევა არ არის, ExclusiveTV-მ კომენტარი, იტალიური უძრავი ქონების ერთ-ერთ სააგენტოს წარმომადგენელს სთხოვა. პიროვნებამ ანონიმურად დარჩენა ამჯობინა, მაგრამ ჩვენთან საუბრისას ფაქტი დაადასტურა და პრობლემის არსის ახსნაც სცადა.

„ძალიან ვწუხვარ გოგონას გამო, მაგრამ ამ შემთხვევაში რასიზმი, ან დისკრიმინაცია მინდა გამოვრიცხო. ეს არის ბიზნესი. ბინის მეპატრონეებს ძალიან ხშირად ხვდებათ პრობლემები უცხოელებთან დაკავშირებით, რადგან არც ისე იშვიათად, ისინი ქირის საფასურს ვერ, ან არ იხდიან. ყოფილა ისეთი შემთხვევაც, როცა ღამით გაპარულან და რამდენიმე თვის გადაუხდელი ქირა და კომუნალური გადასახადები ვალად დაუტოვებიათ. არის კიდევ ერთი მნიშვნელოვანი ფაქტორი, უცხოელები ხშირად ოჯახებით, მცირეწლოვანი ბავშვებით ქირაობენ ბინას. ეს ძალიან დელიკატური თემაა, რადგან თვეობით ქირის გადაუხდელობის შემთხვევაშიც კი, მეპატრონე, ბინის დაცლას ვერ მოითხოვს, რადგან იტალიის კანონმდებლობის მიხედვით, მცირეწლოვანის გამოსახლება და ქუჩაში დატოვება შეუძლებელია. კიდევ ვიმეორებ, ნუ შევხედავთ ამას როგორც დისკრიმინაციის გამოხატულებას. უძრავი ქონების მფლობელები, ფინანსური ინტერესებიდან გამომდინარე მოქმედებენ“.

მოამზადა ნინა მამუკაძემ