იტალიაში მომდევნო თვიდან ყველა პროფესიის ადამიანი ვალდებული იქნება, სამსახურში კოვიდ სერტიფიკატი ე.წ. "მწვანე ბარათი" წარადგინოს - უცხოური მედია

იტალიაში მომდევნო თვიდან ყველა პროფესიის ადამიანი ვალდებული იქნება, სამსახურში კოვიდ სერტიფიკატი ე.წ. "მწვანე ბარათი" წარადგინოს.

ინფორმაციას Reuters-ი ავრცელებს.

გამოცემის ცნობით, ამ რეგულაციის მიხედვით, ყველა სახელმწიფო თუ კერძო კომპანიაში დასაქმებულებს სამსახურში გამოცხადებისას ე.წ. "მწვანე ბარათის" წარდგენა მოუწევს, წინააღმდეგ შემთხვევაში, მათ ჯარიმის გადახდა მოუწევთ, რომლის ოდენობა  400-დან 1 000 ევრომდეა.

ასევე, იმ შემთხვევაში, თუ დასაქმებული სამსახურში 5 სამუშაო დღის განმავლობაში არ გამოცხადდება, დამსაქმებელს აქვს უფლება სამუშაო კონტრაქტი შეწყვიტოს თანამშრომელთან.

ქვეყანაში პირველი სექტემბრიდან უკვე მოქმედებს კანონი, რომლის მიხედვითაც კოვიდ სერტიფიკატის წარდგენა  სავალდებულოა შიდა ავიარეისების, მატარებლების, ავტობუსებისა და ბორნით მგზავრებისთვის.

პირველი სექტემბრიდან, "მწვანე ბარათი" ასევე აუცილებელია, სასწავლო დაწესებულების თანამშრომლებისთვის.

იტალიის მთავრობაში აცხადებენ, რომ მკაცრი შეზღუდვები ვაქცინაციის პროცესის დაჩქარებისკენ არის მიმართული.

როგორც ვარაუდობენ, ახალი წესის შესახებ შესაბამის გადაწყვეტილებას, იტალიის მთავრობა დღეს მიიღებს, რომელიც 15 ოქტომბრიდან შევა ძალაში.