„სცენა სცენაა, სადაც სპექტაკლები უნდა იმართებოდეს და არა ლოზუნგები, მოწოდებები გაისმოდეს“ - კახა ჯოხაძე

„სცენა სცენაა, სადაც სპექტაკლები უნდა იმართებოდეს და არა ლოზუნგები, მოწოდებები გაისმოდეს. ჩემთვის ეს იმ პარტიულ შეკრებებს ემსგავსება, სუფრაზე წითელ ბარხატს რომ გადააფენდნენ, გრაფინით წყალს დადგამდნენ და ქვეყნის ავბედითობაზე ბჭობდნენ“, - ამის შესახებ მსახიობი კახა ჯოხაძე ჟურნალ „გზასთან“ ინტერვიუში საუბრობს. 

მისი თქმით, თეატრი სხვა სამყაროა და სცენას სხვა დატვირთვაა აქვს, ეს არ არის ადგილი პროტესტის გამოსახატავად.

„მსახიობებს თუ რამე პროტესტი აქვთ, გამოხატვის საშუალება სხვა პიედესტალი უნდა იყოს და არა სცენა. სცენას სხვა დატვირთვა აქვს, სცენა კულტურის ამბავია და შენ თუ გინდა კულტურის სახელით სხვაგან გამოდი, სულაც ქუჩაში დადექი ან შენი აივნიდან გადმოდექი და ისე თქვი სათქმელი. თეატრი სხვა სამყაროა; თეატრს და პოლიტიკას არ სჭირდება გაიგივება და ჯაჭვის გადაბმა; თეატრი არ არის პოლიტიკური რგოლი, თუმცა რაღაც გავლენა შეიძლება იქონიოს. ჩემთვის სასურველია, თეატრი დამოუკიდებელ, ჯადოსნურ სამყაროდ დარჩეს“ - ამბობს მსახიობი.

ცნობისთვის, რამდენიმე თვის წინ თეატრის სცენიდან სპექტაკლის შემდგომ, მსახიობებმა დავით ბეჟიტაშვილმა, რეჟისორმა დავით დოიაშვილმა და სხვადასხვა თეატრის დასის წევრებმა მაყურებელს „გამჭვირვალობის კანონის“ აკრძალვასთან დაკავშირებით პოლიტიკური განცხადებით მიმართეს.