არჩილ გორდულაძე: ეს ადამიანები ვერ იტანენ ერთმანეთს, ატანა არ აქვთ, მაგრამ უნდა იყვნენ გაერთიანებულები სხვადასხვა პარტიული ნიშნებით მხოლოდ იმიტომ, რომ ასეთი არის მათი პატრონის დავალება

 პარლამენტის იურიდიულ საკითხთა კომიტეტის თავმჯდომარე, არჩილ გორდულაძე რადიკალურ ოპოზიციაში განხეთქილებას ეხმიანება და აღნიშნავს, რომ ისინი ვერ იტანენ ერთმანეთს, მაგრამ იძულებულები არიან გაერთიანდნენ სხვადასხვა პარტიული ნიშნებით მხოლოდ იმიტომ, რომ ასეთი არის მათი პატრონის დავალება.

„ეს ადამიანები ვერ იტანენ ერთმანეთს, ატანა არ აქვთ, მაგრამ უნდა იყვნენ გაერთიანებულები სხვადასხვა პარტიული ნიშნებით მხოლოდ იმიტომ, რომ ასეთი არის მათი პატრონის დავალება. მათ პატრონს ჰგონია, რომ თუ დაქსაქსავს „ნაცებს“ სხვადასხვა პარტიაში და შემდეგ შეეცდება, რომ განსაკუთრებით ახალგაზრდები მოატყუოს, რომ კოალიციური მმართველობით შესაძლებელია, რომ კოლექტიური „ნაცები“ მოვიდნენ ხელისუფლებაში და ამით თავის მავნებლურ მიზანს მიაღწევს. „ნაცი“ ხელისუფლებაში ვეღარასდროს ვეღარ დაბრუნდება იმიტომ, რომ ასეთია მისი უდიდებულესობა ქართველი ხალხის გადაწყვეტილება“, - განაცხადა გორდულაძემ.

რადიკალურ ოპოზიციაში განხეთქილებაა. მიზეზი თვითმმართველობის არჩევნებში მონაწილეობის საკითხია. გარდა ამისა, არსებული ინფორმაციით ერთმანეთს ნიკა გვარამია და ნიკა მელიაც დაუპირისპირდნენ. მელია უთანხმოებასთან დაკავშირებით დასმულ შეკითხვას თავს არიდებს, თუმცა ადასტურებს, რომ ის და გვარამია დიდი ხანია პარტიულ საქმიანობას სხვადასხვა ოფისიდან ეწევიან.