გოჩა ქიმაძე: ამაყი ვარ, რადგან როგორც ჩანს, შევძელი წინა ოთხ წელიწადში მეკეთებინა ის, რაც ჩვენს ხალხს და ჩვენს მუნიციპალიტეტს სჭირდებოდა, თუ რამე გაკეთდა ადიგენში, მინიმუმ ორჯერ მეტი გაკეთდება, ვიდრე გაკეთდა გასული ოთხი წლის მანძილზე

„ამაყი ვარ იმიტომ, რომ როგორც ჩანს, მე შევძელი წინა ოთხ წელიწადში მეკეთებინა ის, რაც ჩვენს ხალხს და ჩვენს მუნიციპალიტეტს სჭირდებოდა. რაც მთავარი იყო, როგორც ჩანს, ხალხის ნდობა შევიძინე, რაც ჩემთვის ყველაზე მნიშვნელოვანი იყო. ეს კიდევ ნიშნავს იმას, რომ თუ რამე გაკეთდა ადიგენში, მინიმუმ ორჯერ მეტი გაკეთდება, ვიდრე გაკეთდა გასული ოთხი წლის მანძილზე“, - ამის შესახებ „ქართული ოცნების“ ადიგენის მერობის კანდიდატმა გოჩა ქიმაძემ განაცხადა.

გოჩა ქიმაძემ განხორციელებულ პროექტებზე ისაუბრა, მათ შორის, გამოყო თამარ მეფის ქუჩაზე საგამოფენო სივრცე და ტურისტული ცენტრი, სადაც სხვადასხვა აქტივობები იმართება.

გოჩა ქიმაძის თქმით, რაიონისთვის ამჟამად მთავარი გამოწვევა კულტურის სახლის მშენებლობაა, რომლის დასაწყებად განკარგულების გამოცემას ელოდებიან.

„აქ ერთი უბრალო, ჩვეულებრივი ფერდი იყო და გადავწყვიტეთ, რომ გაგვეკეთებინა გადასახედი, სადაც ტურისტები მივიდოდნენ, შეიკრიბებოდნენ. ამ ოთხი წლის განმავლობაში რა აქტივობებიც გვქონდა, ერთ-ერთ იდეად, რომელიც ჩემი იდეა და პროექტი იყო, შემიძლია ამით ვიამაყო.

ამ ოთხი წლის მანძილზე დაახლოებით, 40 მილიონზე მეტი არის დახარჯული ინფრასტრუქტურის მიმართულებით. თითქმის აღარ დაგვრჩა სოფელი, სადაც ამ მხრივ გამოწვევა გვაქვს. რაც შეეხება გაზიფიცირებას, 14 სოფელი გვაქვს დარჩენილი, სადაც გაზი არ არის შეყვანილი. ამ 14 სოფლიდან, ორში უკვე მშენებლობა მიმდინარეობს. ჩვენი რაიონისთვის მთავარი გამოწვევა არის ის, რომ კულტურის სახლი არ აქვს რაიონს. პროექტი გამზადებულია, გადაწყვეტილებაც მიღებულია. ახლა დასაწყებად ველოდებით განკარგულების გამოცემას. იქნება მულტიფუნქციური, იქნება სპორტული დარბაზი, საცურაო აუზი, იქნება რამდენიმე დარბაზი, სადაც სხვადასხვა ღონისძიებები ჩატარდება“, - განაცხადა გოჩა ქიმაძემ.