მალხაზ გულაშვილი: დღეს ეს ევროკავშირი გეოპოლიტიკურადაც და პოლიტიკურადაც პირადად ჩემთვის არ წარმოადგენს საინტერესო სივრცეს, სადაც მე და ჩემი ქვეყანა უნდა ვესწრაფოდეთ გაწევრიანებას

დღეს ეს ევროკავშირი გეოპოლიტიკურადაც და პოლიტიკურადაც პირადად ჩემთვის არ წარმოადგენს საინტერესო სივრცეს, სადაც მე და ჩემი ქვეყანა უნდა ვესწრაფოდეთ გაწევრიანებას, - განაცხადა გადაცემაში „EURO ანატომია“ „ჯორჯიან თაიმსის“ დამფუძნებელმა, საერთაშორისო ურთიერთობათა დოქტორმა, მალხაზ გულაშვილმა.

მისივე თქმით, გენდერულ თემებზე გარე ძალების ზეწოლისგან თავის დაცვა მხოლოდ ერისა და ხელისუფლების ერთიანობის შედეგად შეიძლება.

„როდესაც 29 აპრილს გამოვიდა ბიძინა ივანიშვილი და ერს მოუწოდა, რომ ჩვენ დაუმორჩილებლობას ვიწყებთ იმ კანონების წინააღმდეგ, რომელსაც თავს გვახვევენ, მთელმა ერმა დადებითად და პოზიტიურად უპასუხა. თუ გახსოვთ, არჩევნებში ზუსტად იმ რაოდენობის ადამიანმა დაუჭირა მხარი მმართველ ძალას, რაც გამოვიდა ქუჩებში - 1,300 მლნ მხარი დაუჭირა მმართველ ძალას. ხელისუფლება უნდა ახორციელებდეს ერისა და ქართველი ხალხის ინტერესებს და შესაბამისად, ვერანაირი ძალა, ვერც მსოფლიოს გლობალური ძალები და ვერანაირი ძალები ვერ შეარყევენ ქართველი ერისა და საქართველოს ხალხის ურყევ ნებას“, - აღნიშნა გულაშვილმა.

კითხვაზე, ევროკავშირის წევრ ქვეყნებზე ზეწოლის გათვალისწინებით, გახდება თუ არა საქართველოში მიღებული ოჯახური ღირებულებების დაცვის კანონი ევროინტეგრაციის შემაფერხებელი ბარიერი, გულაშვილმა განაცხადა, რომ იგი დარწმუნებულია, 2028-2030 წლისთვის საზოგადოება სხვანაირ ევროკავშირს იხილავს.

„ისეთს ვერ ვიხილავთ, როგორიც დღეს არის. დღეს ეს ევროკავშირის გეოპოლიტიკურადაც და პოლიტიკურადაც პირადად ჩემთვის არ წარმოადგენს საინტერესო სივრცეს, სადაც მე და ჩემი ქვეყანა უნდა ვესწრაფოდეთ გაწევრიანებას. იქ აქვთ რაღაც ახირებული აზრები და ამ ახირებული აზრების გამო ქართველი ერი არ მოინდომებს ამ გაერთიანებაში გაწევრიანებას, პირდაპირ გეტყვით“, - აღნიშნა გულაშვილმა.

მისივე თქმით, ჩვენი ეროვნული ღირებულებები „ევროკავშირის ღირებულებისგან როგორც ცა და დედამიწა ისე განსხვავდება“.

„შესაბამისად, რა გვინდა ისეთ გაერთიანებაში, სადაც ჯერ არ შევსულვართ და უკვე რაღაც დიქტატორული მეთოდებით გვეპყრობიან და ტოტალიტარული მეთოდებით გვაიძულებენ, რაღაც გადაწყვეტილებები მივიღოთ, რომელიც არც ღმერთისა და არც ადამიანის წინაშე არანაირ ღირებულებას არ წარმოადგენს“, - განაცხადა გულაშვილმა.