მალხაზ გულაშვილი: ყველა სუვერენულ სახელმწიფოს თვითონ აქვს უფლება, თავად განკარგოს, რა კანონი მიიღოს და როგორ. ევროკავშირის წევრი რომც გახდე, ევროკავშირის კანონი ვერანაირად პრიმატული ვერ გახდება ადამიანის უფლებების დარღვევის ხარჯზე

ყველა სუვერენულ სახელმწიფოს თვითონ აქვს უფლება, თავად განკარგოს, რა კანონი მიიღოს და როგორ. ევროკავშირის წევრი რომც გახდე, ევროკავშირის კანონი ვერანაირად პრიმატული ვერ გახდება ადამიანის უფლებების დარღვევის ხარჯზე, ეს არის ადამიანის უფლებების დარღვევა, ბავშვების უფლებების დარღვევა, რაც დაუშვებელია, - განაცხადა გადაცემაში „EURO ანატომია“ „ჯორჯიან თაიმსის“ დამფუძნებელმა, საერთაშორისო ურთიერთობათა დოქტორმა, მალხაზ გულაშვილმა ევროკავშირის მართლმსაჯულების დაცვის სასამართლოს მიერ უნგრეთისთვის ბავშვთა და ოჯახის დაცვის შესახებ კანონის გაუქმების მოთხოვნაზე საუბრისას.

მისივე თქმით, მსგავსი ტიპის დარღვევები, როდესაც ზეწოლას ახორციელებენ ბავშვებზე და მათ უკარგავენ არჩევანის უფლებას, საზოგადოების ძალიან მკაცრი ყურადღების ქვეშ უნდა მოექცეს.

„ღმერთმა ადამიანი შექმნა მამაკაცად და დედაკაცად და ისინი რატომ ცდილობენ, რომ ორი მამა ან ორი დედა იყოს? ამის მიზანია, თავს მოგვახვიონ საკუთარი იდეოლოგია, რომელიც არ არის ქრისტიანული, ადამიანური, ძალიან შორს არის მორალური პრინციპებისგან და იმ ღირებულებებისგან, რაც ადამიანს ოდითგანვე ამოძრავებს და ამოქმედებს.

ევროპას და დანარჩენ მსოფლიოს ჩვენ ერთი გაკვეთილი უკვე ჩავუტარეთ 17 მაისის სახით, მეორე გაკვეთილი იყო უწმინდესის და უნეტარესის დაკრძალვაზე, მესამე გაკვეთილი ჩავუტარეთ იმით, როგორ ავირჩიეთ ახალი პატრიარქი და მეოთხე გაკვეთილი ჩავატარეთ, თუ როგორ მოვახდინეთ მისი აღსაყდრება და ამით საქართველომ აჩვენა, რომ არც ერთი ქართველი უკან დამხევი არ არის ამ ღირებულებების გადასაკეთებლად ან დასათმობად“, - აღნიშნა მალხაზ გულაშვილმა.