მალტაზე საქართველოს საპატიო საკონსულო გაიხსნა - ხათუნა თოთლაძის შეხვედრა მალტის საგარეო საქმეთა მინისტრთან

მალტის რესპუბლიკაში სამუშაო ვიზიტის ფარგლებში საქართველოს საგარეო საქმეთა მინისტრის მოადგილემ, ხათუნა თოთლაძემ შეხვედრა გამართა მალტის საგარეო და ევროპულ საქმეთა მინისტრთან, ევარისტ ბარტოლოსთან.

შეხვედრაზე მხარეებმა საქართველოსა და მალტას შორის არსებული ურთიერთობები განიხილეს და ორმხრივ და მრავალმხრივ ფორმატში თანამშრომლობის ასპექტებზე ისაუბრეს. ხაზი გაუსვეს მაღალი დონის ორმხრივი ვიზიტების განხორციელების მნიშვნელობას; საერთაშორისო ორგანიზაციების ფარგლებში ნაყოფიერ თანამშრომლობას, მათ შორის, კანდიდატურების მხარდაჭერის კუთხით.

განსაკუთრებული ყურადღება დაეთმო საქართველო-ევროკავშირის თანამშრომლობას და  ევროპული ინტეგრაციის გზაზე საქართველოს მიერ მიღწეულ წარმატებებს. ისაუბრეს  საქართველოს მიერ ევროკავშირში სრულფასოვან წევრობაზე განაცხადის წარდგენის და ევროკავშირთან ფიზიკური დაახლოების თემაზე, „ასოცირებული ტრიოს“ პერსპექტივებზე, აღმოსავლეთ პარტნიორობის  სამიტთან დაკავშირებულ მოლოდინებზე. ხათუნა თოთლაძემ ყურადღება გაამახვილა აღნიშნულ პროცესში მალტის მხარდაჭერის მნიშვნელობაზე.

შეხვედრაზე განხილულ იქნა საქართველოს ოკუპირებული ტერიტორიების საკითხი და სამხრეთ კავკასიის რეგიონში არსებული ვითარება. ევარისტ ბარტოლომ დაადასტურა საქართველოს სუვერენიტეტისა და ტერიტორიული მთლიანობისადმი მალტის ურყევი მხარდაჭერა.

მხარეებმა ისაუბრეს კულტურის, განათლების, ეკონომიკის სფეროში ურთიერთობების ინტენსიფიკაციის მნიშვნელობაზე. ყურადღება გაამახვილეს განათლების სფეროში არსებულ აქტიურ კონტაქტებზე, კერძოდ მალტის დიპლომატიურ აკადემიასთან ქართული მხარის თანამშრომლობაზე.

შეხვედრაზე კმაყოფილებით აღნიშნეს მალტაზე საქართველოს საპატიო საკონსულოს ამოქმედება, რომელსაც მირიამ კამილერი გაუძღვება. მხარეებმა იმედი გამოთქვეს, რომ ეს ფაქტი კიდევ უფრო შეუწყობს ხელს ორ სახელმწიფოსა და ორ ხალხს შორის ურთიერთობებისა და კავშირების განმტკიცებას. აღსანიშნავია, რომ საპატიო საკონსულოს ინაუგურაცია მალტის რესპუბლიკაში ხათუნა თოთლაძის ვიზიტის ფარგლებში, 5 დეკემბერს შედგა.

საქართველოს საგარეო საქმეთა სამინისტრო