სტიქიამ ზუგდიდის ბოტანიკურ ბაღში, მრავალწლოვანი ხეები წააქცია - ბაღი ვიზიტორებისთვის დროებით დაიკეტა

სტიქიამ და გადაუღებელმა წვიმებმა სამეგრელოში, ზუგდიდის ღირსშესანიშნაობა, ბოტანიკური ბაღიც დააზარალა.

როგორც ბოტანიკური ბაღის ადმინისტრაციის მიერ გავრცელებულ განცხადებაშია ნათქვამი, ბაღი ვიზიტორებისთვის უსაფრთხოებიდან გამომდინარე დროებით დაკეტილია.

რაც შეეხება ზარალს, უხვი ნალექის შედეგად  წყალმა დატბორა ბოტანიკური ბაღის ეზო და წააქცია რამდენიმე მრავალწლიანი ხე. 

"წვიმის სახით მოსულმა უხვმა ნალექმა ზუგდიდის ბოტანიკურ ბაღს გარკვეული სახის ზიანი მიაყენა.

წაქცეულია რამდენიმე ერთეული ხე, შედეგად დაზიანდა და გაირღვა რამდენიმე ადგილას ბოტანკური ბაღის ღობე, დაზიანებულია განათებები, ბაღში არსებულმა სადრენაჟე სისტემამ ვერ უზრუნველყო უხვი ნალექის გადინება ,შესაბამისად დაიტბორა ბოტანიკური ბაღის ნაწილი. 

აღნიშნულთან დაკავშირებით, ზუგდიდის მუნიციპალიტეტის მერია დამატებით სადრენაჟე სისტემის მოწყობის სამუშაოებს განახორციელებს  რათა მომავალში  მსგავსი სახის პრობლემის წარმოქმნის ალბათობა მინიმუმადე იქნეს დაყვანილი.

დილიდანვე, ბოტანიკურ ბაღში მუშაობენ შესაბამისი სამსახურების ოპერატიული ჯგუფები და მიმდინარეობს ბოტანიკური ბაღის იერსახის მოწერიგება.

სტიქიისგან მიყენებულ ზარალს სპეციალური კომისია შეისწავლის.

მოქალაქეების უსაფრთხოების მიზნით დღეს ბოტანიკურ ბაღი ვიზიტორებისთვის დაკეტილია", - აღნიშნულია განცხადებაში.