დიასპორისა და კავკასიის საკითხთა კომიტეტის სხდომაზე საგარეო საქმეთა სამინისტროს დიასპორასთან ურთიერთობის დეპარტამენტის საქმიანობის შესახებ ინფორმაცია მოისმინეს

„იყავი შენი ქვეყნის ახალგაზრდა ელჩი“; „დიასპორული ინიციატივების მხარდაჭერა“ და „უცხოეთში მოქმედი ქართული ცეკვისა და სიმღერის ანსამბლების მხარდაჭერა“ - დიასპორისა და კავკასიის საკითხთა კომიტეტის სხდომაზე საგარეო საქმეთა სამინისტროს დიასპორასთან ურთიერთობის დეპარტამენტის საქმიანობის შესახებ ინფორმაცია მოისმინეს.
 
კომიტეტმა 2022 წლის 27 მაისს, დიასპორის დღისადმი მიძღვნილი ფორუმის „ქართული დიასპორა საქართველოს ევროპული მომავლისთვის“ შედეგებსა და სამუშაო ჯგუფებში მიღებულ წინადადებებზე იმსჯელა.

კომიტეტმა ასევე იმსჯელა 2022 წლის 10 ივნისს, თურქეთ-საქართველოს ბიზნეს ფორუმზე - „ჩვენებურები“ წარმოდგენილ წინადადებებსა და მიღებულ რეკომენდაციებზე.

კომიტეტის სხდომაზე მიმოიხილეს, თუ როგორ მიმდინარეობს 2022 წლის დიასპორული საგრანტო პროექტები: „იყავი შენი ქვეყნის ახალგაზრდა ელჩი“; „დიასპორული ინიციატივების მხარდაჭერა“ და „უცხოეთში მოქმედი ქართული ცეკვისა და სიმღერის ანსამბლების მხარდაჭერა“. კომიტეტის თავმჯდომარე ბექა ოდიშარიამ სამომავლოდ განსახორციელებელ ღონისძიებებზეც გაამახვილა ყურადღება და ასევე, დაინტერესდა თუ რა პროგრესია პრემიერ-მინისტრის მიერ გაჟღერებულ ინიციატივებთან დაკავშირებით. „მინდა დიდი მადლობა გადავუხადო საგარეო საქმეთა სამინისტროს ნაყოფიერი მუშაობისთვის და იმედი მაქვს, რომ სამომავლოდაც ასეთივე თანამშრომლობას გავაგრძელებთ“, - მიმართა საგარეო საქმეთა სამინისტროს წარმომადგენლებს კომიტეტის თავმჯდომარემ.