იტალიელი მწერალი, უმბერტო ეკო - „რუსთაველი, ეს ვინღა იყო?”

იცით თუ არა, რომ იტალიელმა მწერალმა უმბერტო ეკომ, 2010 წლის ნოემბერში, იტალიურ ჟურნალ „ესპრესოში“ გამოაქვეყნა სტატია, სახელწოდებით „რუსთაველი, ეს ვინღა იყო?”

მიუხედავად იმისა, რომ ამავე წელს იტალიის დედაქალაქში, ვილა „ბორგეზეში“, ჰომეროსის ქუჩაზე, მოქანდაკე იაკობ ნიკოლაძის მიერ 1946 წელს ბრინჯაოში ჩამოსხმული რუსთაველის ბიუსტი დაიდგა, ეკო ცდილობდა წარმოეჩინა, თუ რამდენად დიდ პრობლემად რჩება რუსთაველის ცნობადობის საკითხი.

იგი წერს:

„შესაძლებელია თუ არა, გლობალური სამყაროსთვის მისაღებ განათლებაზე საუბარი, როდესაც განათლებული ევროპელების 99 პროცენტი არ იცნობს ნაწარმოებს – რუსთაველის „ვეფხისტყაოსანს” – რომელსაც ქართველები ლიტერატურის ისტორიის ერთ-ერთ უდიდეს პოემად მიიჩნევენ. და ეს მაშინ, როდესაც იმაზეც კი ვერ შევთანხმდით, ჩვენთვის უცხო ანბანის მქონე ენაზე სინამდვილეში რის ტყავზე იყო საუბარი: პანტერას, ვეფხვის თუ ლეოპარდის?”.

„ეკო, მისთვის დამახასიათებელი სიღრმით და გონებამახვილობით წერს რუსთაველის გენიალურობაზე და იქვე, ქვეტექსტით, იმ ევროპელი მკითხველის სნობიზმსაც აკრიტიკებს, რომელსაც მცირერიცხოვანი ერების დიდ ლიტერატურაზე არაფერი სმენია.” - აღნიშნავს გიორგი ლობჟანიძე.

წყარო: ქართულ-იტალიური ასოციაცია „მერანი“.