"ვინც სიმართლეს, ზნეობასა და კულტურას შეებრძოლა, ყველა დამარცხდა" - გია მურღულია

"როდესაც თავად არაფერს წარმოადგენ და უკიდურესად "დაბალი" ხარ, ერთადერთი შანსი თუ "გამაღლების" შესაძლებლობა გაქვს: ნიჭიერების, კულტურისა და ღირსების "ნანგრევებზე" დადგე", - ამის შესახებ ფილოლოგიის დოქტორი, პედაგოგი გია მურღულია სოციალურ ქსელში წერს:

"როდესაც სპეციალურად "მომართული" და მოტივირებული ხარ, ყველასი და ყველაფრის დაცინვა, დამცირება, გაქილიკება და უარყოფა შეიძლება:

ბიბლიის, პლატონის, ალექსანდრე მაკედონელის, წმინდანების,  რუსთველის, დანტე ალიგიერის, ლეონარდოსი, მიქელანჯელოსი, მოცარტის, ბეთხოვენის,  ჰეგელის, მარტინ ლუთერ კინგის, პელესი, მაიკლ ჯორდანის, პრეზიდენტებისა და კანცლერების, პატრიარქებისა და პაპების, ადამიანის უფლებათა დეკლარაციის, ნებისმიერი კანონის, სააზროვნო, კულტურული და სპორტული მიღწევის.

ასეთ მდგომარეობაში იესოსაც ჯვარს აცვამ და დაცინვით იკითხავ: "რა არის ჭეშმარიტება?!"

თურმე თვითდამკვიდრებისა და "წარმატებისთვის" შეიძლება ყველაფერი დაგმო და მიწასთან გაასწორო, რისთვისაც კაცობრიობას თავისი განვითარებისას მიუღწევია.

თვალის გახელისთანავე ბოღმასთან და ღვარძლთან ზიარება პატარა ადამიანთა თვისება და ხვედრია.

როდესაც თავად არაფერს წარმოადგენ და უკიდურესად "დაბალი" ხარ, ერთადერთი შანსი თუ "გამაღლების" შესაძლებლობა გაქვს: ნიჭიერების, კულტურისა და ღირსების "ნანგრევებზე" დადგე.

და რა მერე?

საბოლოო ანგარიშით, ყოველთვის ირკვევა, ვინ არის ბითური და ბოროტი არარაობა - ისტორიამ ზუსტ სახელთა დარქმევა იცის.

ვინც სიმართლეს, ზნეობასა და კულტურას შეებრძოლა, ყველა დამარცხდა.

თუ საკუთარი თავის გარდა სიკეთეს, სიმართლესა და ღირსებას არავისსა და არაფერში ხედავ, ისღა დაგრჩენია, ფიქრი, ენა და ქცევა ეშმაკს მიჰყიდო.

მერე მან იცის, როგორ მოგექცეს - დაცინვა და უარყოფა მისი მოგონილია", - წერს მურღულია.