მოფარიკავე სანდრო ბაზაძე ევროპის ჩემპიონი გახდა

სანდრო ბაზაძემ თურქეთის ქალაქ ანტალიაში მიმდინარე ევროპის ჩემპიონატზე, ხმლით ფარიკაობაში ყველა მეტოქეს აჯობა და ევროპის ჩემპიონის ტიტული მოიპოვა.

28 წლის ქართველი მოფარიკავე საწყის ეტაპზევე დაუპირისპირდა ოლიმპიური თამაშების სამგზის ჩემპიონს, უნგრელ არონ სილაგის, რომელთანაც ტოკიოს ოლიმპიადაზე ნახევარფინალში დამარცხდა.

უმთავრესი კონკურენტის ძლევის შემდეგ, ბაზაძემ ფინალის გზაზე სამი მეტოქე ჩამოიშორა.

"პირველ რიგში დიდი მადლობა ოჯახის წევრებს, ასევე ფარიკაობის ფედერაციის დიდ ოჯახს.

მოსამზადებელი პერიოდი ძალიან რთული გამოდგა, როგორც ფიზიკურად, ასევე მენტალურად. მაგრამ ეს სპორტია, თუ არ დანებდები და ყველაფერს გააკეთებ, შედეგს აუცილებლად მიაღწევ. ამიტომ ძალიან ამაყი და ბედნიერი ვარ, კიდევ ერთხელ მადლობა მინდა ვუთხრა ჩემი გუნდის ყველა წევრს, ექიმებს, მწვრთნელებს.

ეს ძალიან სასიამოვნო შეგრძნებაა, როდესაც დიდი  შრომით მიაღწევ შედეგს. 

ევროპის ჩემპიონატის მოსამზადებელი პერიოდი საფრანგეთში, ორლეანში გავატარე, ჩემს პირად მწვრთნელ კრისტიან ბაუერთან.

რთული იყო, რადგან ბაუერი დიდი პროფესიონალი და ძალიან მომთხოვნი მწვრთნელია.  ეს იყო რთული გზა დიდი შედეგისკენ, მე მაქსიმუმი გავაკეთე და შედეგი სახეზეა. 

ძალიან რთული დღე იყო, ეს ევროპის ჩემპიონატია და იოლი მეტოქე და იოლი ბრძოლა აქ  არ არის.

წინ მსოფლიო ჩემპიონატია და ჩემი მიზანი რა თქმა უნდა საუკეთესო შედეგია.

მე მაქვს საკმარისი ძალა რომ კიდევ ერთხელ გავაკეთო ჩემი მაქსიმუმი",- განაცხადა სანდრო ბაზაძემ ბრძოლის წარმატებით დასრულების შემდეგ.

სანდრო ბაზაძე ევროპის ჩემპიონი პირველად გახდა.აქამდე მის ანგარიშზე სამი ბრინჯაოს მედალი იყო.