მარინე ლობჟანიძე: რატომღაც ისეთი სტერეოტიპი ჩამოყალიბდა, რომ თუ შენ განსხვავებულად ფიქრობ, შენ უპირობოდ ხარ მოღალატე და მონა

თავისუფლებაში არ უნდა მოიაზრო ის, რომ შენი თავისუფალი სიტყვითა და დამოკიდებულებით მორალურად, ფსიქიკურად და ფიზიკურად განადგურდეს შენი მოწინააღმდეგე რესპონდენტი, რომელიც შენ ამა თუ იმ შეხედულებაში არ გეთანხმება, - განაცხადა „დღის ქრონიკაში“ ჩართვისას საზოგადოება „ქართულის“ თანადამფუძნებელმა, მუსიკოსმა, მარინე ლობჟანიძემ.

მან სიტყვისა და გამოხატვის თავისუფლებასთან დაკავშირებითგანაცხადა, რომ დღეს ყველას აქვს გამოხატვის თავისუფლება - საუბარია მხოლოდ იმაზე, რომ ვინმემ თავისი შეფასებით არ უნდა „მოკლას სხვა ადამიანი“.

„ხომ შეიძლება, არგუმენტირებულად, მშვიდად, წყნარად, იმ ფარგლებში, რასაც შენ გაძლევს მეტყველება, თუნდაც იყავი მკაცრი, პრინციპული, დაუნდობელი შენს შეხედულებებში, მაგრამ იმ ადამიანს ნუ გაანადგურებ, ნუ მოსპობ იმის გამო, რომ იგი განსხვავებულად ფიქრობს.

რაც მთავარია, რატომღაც ისეთი სტერეოტიპი ჩამოყალიბდა, რომ თუ შენ განსხვავებულად ფიქრობ, შენ უპირობოდ ხარ მოღალატე და მონა. აი, ეს არ არის სწორი. ჩვენ ისეთი ქვეყანა ვართ, რომ უნდა შეგვეძლოს ერთმანეთის მოსმენა და გაგება“, - განაცხადა მარინე ლობჟანიძემ.

„სიტყვისა და გამოხატვის თავისუფლების შესახებ“ კანონში შეტანილი ცვლილებებით „ქართული ოცნება“ ხურავს პანდორას იმ ყუთს, რომელიც „ნაციონალებმა“ ქვეყანას ჯერ კიდევ 2004 წელს გაუხსნეს და მოახვიეს თავს - ამ სათაურით საზოგადოება „ქართულმა“ წერილი გამოაქვეყნა.