გივი მიქანაძე: ესტონეთის ხელისუფლების მხრიდან ბოლო წლების განმავლობაში, საქართველოსთან მიმართებაში განხორციელებული არამეგობრული პოლიტიკა არის სამართლიანობისგან მთლიანად დაცლილი, მიზანმიმართული აქტივობა

ესტონეთის ხელისუფლების მხრიდან ბოლო წლების განმავლობაში, საქართველოსთან მიმართებაში განხორციელებული არამეგობრული პოლიტიკა არის სამართლიანობისგან მთლიანად დაცლილი, მიზანმიმართული აქტივობა, - განაცხადა გადაცემაში „იმედის კვირა“ საქართველოს განათლების, მეცნიერებისა და ახალგაზრდობის მინისტრმა გივი მიქანაძემ.

მისივე თქმით, ესტონეთის ელჩის „ილიაუნიში“ ვიზიტი არის კიდევ ერთი გამოხატულება ამ პროცესისა.

„ვფიქრობ, რომ ეს არის მიმდინარე შიდა საქმეებში ჩარევის საკმაოდ უხეში ფორმა, გამომდინარე იქიდან, რომ არც ერთი უნივერსიტეტის ავტონომია არ ირღვევა“, - აღნიშნა მინისტრმა.

მიქანაძემ ასევე ისაუბრა სიახლეზე, რომლის მიხედვითაც ახალგაზრდებს შეეძლებათ აირჩიონ სულ მცირე 3 პროფესიული მიმართულება და იმ შემთხვევაში, თუკი ისინი ვერ შეძლებენ საკმარისი ქულების დაგროვებას, რომ მათთვის სასურველ უნივერსიტეტში შესაბამის ფაკულტეტზე მოხვდნენ, სახელმწიფო სთავაზობს მინიმუმ 10 000 ადგილს პროფესიული მიმართულებით.

„წელს გვაქვს სიახლე, გარდა იმისა, რომ ახალგაზრდებს ექნებათ შესაძლებლობა შესაბამის სარეგისტრაციო კითხვარ-ანკეტებში შემოხაზონ მათთვის საურველი უნივერსიტეტები და ფაკულტეტები, ამასთანავე მათ შეეძლებათ აირჩიონ სულ მცირე 3 პროფესიული მიმართულება და იმ შემთხვევაში, თუკი ისინი ვერ შეძლებენ საკმარისი ქულების დაგროვებას, რომ მათთვის სასურველ უნივერსიტეტში შესაბამის ფაკულტეტზე მოხვდნენ, სახელმწიფო სთავაზობს მინიმუმ 10 000 ადგილს პროფესიული მიმართულებით და სრულ დაფინანსებას, რომ მათ გააგრძელონ სწავლა მათ მიერ შერჩეული პროფესიების დასაუფლებლად“, - განმარტა გივი მიქანაძემ.