მარიამ ქვრივიშვილი: კეიპტაუნის კონვენციაზე მიერთება საქართველოში ავიაციის მნიშვნელოვან განვითარებას ხელს შეუწყობს

საქართველო „საავიაციო ობიექტებთან დაკავშირებით მოძრავი მოწყობილობების მიმართ საერთაშორისო გარანტიების შესახებ“ კეიპტაუნის კონვენციასთან მიერთების პროცედურებს ასრულებს. შესაბამისი პროექტი მთავრობამ პარლამენტს უკვე წარუდგინა. აღნიშნული საკითხი პარლამენტის დარგობრივი ეკონომიკისა და ეკონომიკური პოლიტიკისა და საგარეო ურთიერთობათა კომიტეტების სხდომებზე განიხილეს.

როგორც კომიტეტის სხდომაზე ეკონომიკისა და მდგრადი განვითარების მინისტრის მოადგილემ მარიამ ქვრივიშვილმა განაცხადა, კონვენციის მთავარი მიზანია ფინანსური რისკების შემცირება თვითმფრინავებისა და სხვა საავიაციო მოწყობილობების შესყიდვის, იჯარის ან ლიზინგის შემთხვევაში, რაც ადგილობრივ საავიაციო სექტორს გააძლიერებს.

„საქართველოში რეგისტრირებულ ავიაკომპანიებს, კონვენციასთან მიერთების დასრულების შემდეგ, მნიშვნელოვნად გაუმარტივდებათ თვითმფრინავებისა და სხვა საავიაციო მოწყობილობების შესყიდვა ან ლიზინგი. შედეგად, საქართველოში რეგისტრირებულ ავიაკომპანიებს შესაძლებლობა ექნებათ უკეთესი სალიზინგო პირობებით ჩამოიყვანონ საქართველოში უფრო თანამედროვე საჰაერო ხომალდები,“ - აღნიშნა მარიამ ქვრივიშვილმა.

მინისტრის მოადგილის თქმით, კონვენციასთან მიერთებით ასევე გაუმჯობესდება საქართველოს პოზიციონირება საერთაშორისო საავიაციო ინდუსტრიაში. კონვენცია ახდენს სამართლებრივი სტანდარტების ჰარმონიზაციას, რაც ამარტივებს ტრანსნაციონალურ ლიზინგს და ფინანსურ ოპერირებას. შესაბამისად, საქართველო წარმოჩინდება, როგორც საიმედო პარტნიორი საერთაშორისო ავიაბაზრისთვის, რაც თავის მხრივ, ხელს შეუწყობს ინვესტიციების მოზიდვას აღნიშნულ სექტორში.

„დღეს საქართველოს ავიაციის სტატისტიკა რეკორდულ ნიშნულზეა. ბოლო მონაცემებით, საქართველოს აეროპორტებში 60-ზე მეტი სამგზავრო ავიაკომპანია დაახლოებით 100 საჰაერო ხაზზე ოპერირებს. მიმდინარე წელს საქართველოს ავიაბაზარზე რამდენიმე წამყვანი ევროპული ავიაკომპანია შემოვიდა, მათ შორისაა, „ბრიტანეთის ავიახაზები“, „იზიჯეტი“, „ეარ სერბია“ და სხვ. კეიპტაუნის კონვენციასთან მიერთება ხელს შეუწყობს ადგილობრივი ავიაკომპანიების განვითარებას და იმედი გვაქვს, რომ ისინი შეძლებენ, შეასრულონ მეტი პირდაპირი ფრენა როგორც სამგზავრო, ისე სატვირთო მიმართულებით საქართველოსთვის სტრატეგიულად მნიშვნელოვან სამიზნე ქვეყნებში, რაც კიდევ უფრო მეტად გააძლიერებს როგორც ტურიზმის, ისე ავიაციის სექტორებს და ხელს შეუწყობს ქვეყნის ეკონომიკის განვითარებას“ - აღნიშნა მარიამ ქვრივიშვილმა.

აღსანიშნავია, რომ კონვენცია ასევე შექმნის საქართველოში საერთაშორისო სამართლებრივ ჩარჩოს, რომელიც დაიცავს კრედიტორების (მაგ., ბანკების, სალიზინგო კომპანიების) უფლებებს. გარდა ამისა, შესაძლებელი იქნება ნებისმიერი საერთაშორისო ინტერესის დარეგისტრირება შესაბამის რეესტრში (International Registry), რაც უზრუნველყოფს პროცესის გამჭვირვალობას. კეიპტაუნის კონვენციას ამჟამად 86 სახელმწიფოა მიერთებული.

საკომიტეტო მოსმენების შემდეგ, საკითხს საქართველოს პარლამენტი პლენარულ სხდომაზე განიხილავს.