იტალიაში გარდაცვლილი ემიგრანტის კრემაციის საკითხი სიმართლეს არ შეესაბამება, გარდაცვლილს სამშობლოში ხუთშაბთს გადაასვენებენ

ემიგრანტის გარდაცვალების შესახებ ინფორმაცია მეტად სენსიტიური საკითხი გახლავთ და საემიგრაციო საზოგადოებაში ყოველთვის დიდი ვნებათაღელვას იწვევს. გავრცელებულმა ინფორმაციამ, თითქოს იტალიაში კერძოდ ნაპოლში გარდაცვლილ ემიგრანტს, 68 წლის ელენე ხუციშვილის სხეულს კრემაცია ჩაუტარდება,  დიდი შეშფოთება გამოიწვია.

გავრცელებული ინფორმაციის გადასამოწმებლად exclusivetv.ge ნაპოლში მოღვაწე ქართველ ემიგრანტს, სოციალური ხელშეწყობის ასოციაცია „ნინა და საქართველო“-ს პრეზიდენტს, ნინა ლაფაჩიძეს დაუკავშირდა:

ნინა ლაფაჩიძე

- ქალაბტონო ნინო,  შოთა სიხარულიძის მიერ გავრცელებული ინფორმაციით, გარდაცვლილი ემიგრანტის ელენე ხუციშვილის სხეულს კრემაცია ჩაუტარდება, შეესაბამება თუ არა სიმართლეს?

- გარდაცვლილი ემიგრანტის ელენე ხუციშვილის გადასვენება ხუთშაბათს მოხდება. ხუციშვილთან ერთად გადაასვენებენ კიდევ ერთ ქართველ ემიგრანტს. რაც შეეხება გავრცელებულ ინფორმაციას, თითქოს ხუციშვილის სხეულს კრემაცია უტარდება, არის სიცრუე და არ შეესაბამება სიმართლეს. კრემაციის შესახებ გავრცელებულმა არასწორმა ინფორმაციამ ემიგრანტ ქართველებში პანიკური შიში გამოიწვია.

აქვე მინდა მივმართო საინფორმაციო საშუალებებს და იმ პირებს, ვინც საემიგრაციო საკითხებს აშუქებს, რომ ინფორმაციას გადამოწმების გარეშე ნუ გაავრცელებენ.

ასევე გასათვალისწინებელია სხვა ემიგრანტების ფაქტორი, რომლებიც ამ ვერაგ ვირუსს ებრძვიან. როდესაც საემიგრაციო საზოგადოებაში გავრცელდა ჭორი კრემაციის შესახებ, ამ ინფორმაციამ მათი ჯანმრთელობის მდგომარეობა კიდევ უფრო გაართულა, რადგან თითოეულმა მათგანმა თავი არსებულ სიტუაციასთან გააიგივა.

- თუ შეგიძლიათ გვითხრათ, როგორ ხდება გარდაცვლილი ემიგრანტის  გადასვენება და ვინ უზრუნველყოფს ამ პროცესს?

- გარდაცვლილ ემიგრანტთა სამშობლოში გადასვენებას საკონსულო უზრუნველყოფს. როგორც ასოციაციის პრეზიდენტს, ხშირად მიწევს მათთან კომუნიკაცია. ასეთ დროს საკონსულო შესაძლებლობების მაქსიმუმს იყენებს.  გადასვენება ყოველთვის ხდება ოჯახის წევრებთან შეთანხმების შედეგად და ჩემს პრაქტიკაში არასდროს მქონია შემთხვევა, რომ რომელიმე ემიგრანტის სხეულს კრემაცია ჩატარებოდა.

თითოეულ ემიგრანტს, ამ რთულ ვითარებაში, გამძლეობას და ჯანმრთელობას ვუსურვებ. გავუფრთხილდეთ და პატივი ვცეთ ერთმანეთს, ეს ერთადერთი იარაღია, რითაც ჩვენ ერთმანეთის მხარდაჭერას შევძლებთ. 

ავტორი: ხათუნა შარაძე