არჩილ გორდულაძე: სხვა ადამიანების შეურაცხყოფა, თავდასხმა, მათ შორის, პატრიარქზე, ეკლესიაზე, ამის გამართლება არც მორალურია და არც სამართლებრივი

პარლამენტის იურიდიულ საკითხთა კომიტეტის თავმჯდომარის არჩილ გორდულაძის განცხადებით, საზოგადოების მიერ ქვეყნის კულტურის, ისტორიისა და ეროვნული ღირებულებების დაცვის მხარდაჭერა მნიშვნელოვანია.

მისივე თქმით, ადამიანების, მათ შორის შშმ პირების, სოციალურად დაუცველების, ეკლესიისა და პატრიარქის შეურაცხყოფის გამართლება არც მორალურად და არც სამართლებრივად არის დასაშვები.

„კიდევ ერთხელ, კარგია, რომ ძალიან ბევრი ადამიანი ერთიანდება და ხმას იმაღლებს მიზანმიმართულ, დაორგანიზებულ შეტევაზე ქვეყნის კულტურისა და წარსულის წინააღმდეგ და ყველა იმ ღირებულებაზე, რომელიც საქართველოს საქართველოდ, ქართველს ქართველად აქცევს და საქართველოს მოქალაქეს საქართველოს მოქალაქედ. სხვა ადამიანების შეურაცხყოფა, თავდასხმა, მათ შორის პატრიარქზე, მათ შორის ეკლესიაზე, ამის გამართლება არც მორალურია და არც სამართლებრივია.

ნებისმიერი პირი, რომელსაც ჰგონია, რომ არის ხუმრობა სხვა ადამიანების შეურაცხყოფა და განსაკუთრებით შშმ პირები, განსაკუთრებული საჭიროების მქონე პირებზე ხუმრობა ჰგონია მას, რომ ეს არის წესი და სოციალურად დაუცველ ადამიანებზე გაუგონარი სიტყვების თქმა ჰგონია, რომ ეს არის იუმორის ჟანრი და გამაიმუნება არის მათი პოზიციისა, ამ ყველაფრის გასაჟღერებელი ადამიანები, რომლებსაც ეს ყველაფერი ჰგონიათ სიტყვის თავისუფლება, ისეთივე მორალური დამნაშავეები არიან, როგორც ის პირები, რომლებიც ამ ყველაფერს სჩადიან“, - აღნიშნა არჩილ გორდულაძე.