36 წლის დიანა ბერიძის მკვლელობაში ბრალდებული ბერძენი ქირურგი დამნაშავედ ცნეს

დიანა ბერიძის მკვლელობაში ბრალდებული ბერძენი ქირურგი ნაფიცმა მსაჯულებმა ერთხმად დამნაშავედ ცნეს.

ბერძნული მედიის ინფორმაციით,  36 წლის სამი შვილის დედამ კლინიკას ვარიკოზული ვენების მოსაშორებელი ოპერაციისთვის მიაკითხა. საქმის მასალების მიხედვით, ექიმმა ის კლინიკის მიტოვებულ ნაწილში წაიყვანა და პროცედურისთვის არასაჭირო ორი ძლიერი საანესთეზიო პრეპარატი გაუკეთა. სწორედ ამან შეუქმნა პაციენტს რესპირატორული პრობლემები, რამაც მისი გარდაცვალება გამოიწვია.

ბრალდებულმა, დახმარების თხოვნის ნაცვლად, 36 წლის ქალის გვამი მანქანაში ჩადო, ჰალკიდიკის რეგიონში წაიღო და კლდიდან გადააგდო. სწორედ იქ იპოვეს გვამი რამდენიმე დღის შემდეგ.

ბრალდებულმა სხდომის დაწყებისას განაცხადა, რომ შემთხვევა ტრაგიკული სამედიცინო შეცდომა იყო.

„ეს იყო ტრაგიკული სამედიცინო შეცდომა, რაზეც ძალიან ვწუხვარ. არ მქონია მისი მოკვლის განზრახვა. არ მქონია განზრახვა, რომ რაიმე ზიანი მიმეყენებინა დიანასთვის, მით უმეტეს, მომეკლა“,- თქვა ბრალდებულმა ქირურგმა.

36 წლის დაღუპული ქალის ოჯახი  ბრალდებულის განცხადებას -  რომ ეს სამედიცინო შეცდომა იყო,  არ იზიარებს.

ოჯახის ადვოკატი და გარდაცვლილის მეუღლე ცალსახად აცხადებენ, რომ ეს იყო დაგეგმილი, განზრახ მკვლელობა.

“როცა ჩემი მეუღლე მოკლეს, სამივე ბავშვი არასრულწლოვანი იყო. ოჯახის მოსაზრება შემდეგია, რომ ეს იყო წინასწარ დაგეგმილი მკვლელობა, ფაქტები და დოკუმენტები სწორედ ამაზე მიუთითებს. მას გაუკეთეს წამლები, რომლებიც არ კეთდება ასეთი ოპერაციის შემთხვევაში, შემდეგ კი შეიყვანეს იქ, სადაც არცერთ შემთხვევაში არ გადაჰყავთ პაციენტი”, - ამბობდა დიანას მეუღლე პროცესზე.

თესალონიკის ადმინისტრაციულმა სასამართლომ გარდაცვლილის ოჯახისთვის, 700 000 ევროს კომპენსაცია დააწესა.

ასევე საინტერესოა:

🔵 „ფოტო-პროექტის „ქართველი ქალები, კავკასიის მარგალიტები“ ერთ-ერთი ქალი გავხდი“ - რას წერს ნათია ფანჯიკიძე

🔵 Amnesty International: რუსულმა ძალებმა სამხედრო დანაშაული ჩაიდინეს, როდესაც მარტში მარიუპოლის თეატრი დაბომბეს, სადაც ათეულობით ადამიანი დაიღუპა

🔵 სტუდენტები, რომლებიც 3 ივლისის აქციის ფლაერებს არიგებდნენ, ამბობენ, რომ "ქართული ოცნების“ მხარდამჭერები ფიზიკურად დაუპირისპირდნენ