გამოვიყენოთ თუ არა გასულ წელს გამოყენებული, ან ვადაგასული დამცავი? - რჩევები სპეციალისტისგან

ზაფხულის მოახლოებასთან ერთად, აქტუალური ხდება კითხვები, მზისგან დამცავი საშუალებების შესახებ. შეიძლება თუ არა, გამოვიყენოთ გასულ წელს გამოყენებული, ან ვადაგასული დამცავი?
ამ შეკითხვაზე კომპეტენტურ პასუხს გვაძლევს იტალიაში მცხოვრები ქართველი ფარმაცევტი და ერთ-ერთი კოსმეტოლოგიური კომპანიის კონსულტანტი, სოფო კილაძე. 

- გამოვიყენოთ თუ არა გასულ წელს გამოყენებული, ან ვადაგასული დამცავი?

- პასუხია - არა და არა!

📌თუ დასასვენებლად მიდიხართ და უჯრაში შარშანდელი მზისგან დამცავი საშუალება გეგულებათ, სანამ მას ჩემოდანში ჩააგდებდეთ, შეამოწმეთ, ვადა ხომ არ გასვლია. შესაძლოა, ვადა ჯერ კიდევ აქვს, მაგრამ არ იცავდით შენახვის წესებს – მისი გამოყენება არც ამ შემთხვევაში შეიძლება.

📌ისევე როგორც საკვებს, მზისგან დამცავ საშუალებასაც გასდის ვადა და მასში შემავალი ინგრედიენტები ეფექტიანობას კარგავს.

- მაინც რატომ არ შეიძლება ვადაგასული საშუალების გამოყენება?

📌ორი მთავარი მიზეზით. ჯერ ერთი, ის უბრალოდ ვეღარ დაგვიცავს. მეორე მიზეზი კი ბაქტერიებია, რომლებიც, დიდი ალბათობით, გაჩნდება ვადაგასულ კრემში, იქიდან კი თქვენს კანზე მოხვდება.

📌მზისგან დამცავი საშუალებების ვადა უმეტესად ერთი წელია, მაგრამ ჩვენ მათ სათანადოდ ვერ შევინახავთ ასე, რომ ის გაცილებით მალე დაკარგავს დამცავ ეფექტს, ამიტომ, თუნდაც ვადა არ ჰქონდეს გასული, აუცილებლად შეუმოწმეთ კონსისტენცია, სუნი, ფერი და ამის შემდეგ გადაწყვიტეთ, ღირს თუ არა მისი გამოყენება.

ასე რომ, ფრთხილად, სანამ მზეს მიეფიცხებით და მშვიდად წაისვამთ შარშანდელ მზის დამცავს.