„ევროპის ჩემპიონატზე ჩემი შესაძლებლობების მხოლოდ 50% გამოვამჟღავნე, აუცილებლად იქნება 100%-იც“ - გიორგი მამარდაშვილი

საქართველოს ეროვნული ნაკრების მეკარემ გიორგი მამარდაშვილმა სადებიუტო ევროპის ჩემპიონატი შეაფასა და აღნიშნა, რომ ტურნირზე, საკუთარი შესაძლებლობების ნახევარი გამოავლინა. 

23 წლის „გოლკიპერის“ თქმით, მისი მიზანია, მომავალ ტურნირებზე საკუთარი შესაძლებლობების 100%-ის გამოვლენა შეძლოს.

„მინდოდა, კარგად ჩამეტარებინა ეს ევროპის ჩემპიონატი. დიდი ხანი ვემზადებოდი, არ გავჩერებულვარ, ყოველდღიურად ვვარჯიშობდი იმისთვის, რომ ამ ტურნირამდე ისეთ კონდიციამდე მივსულიყავი და ალბათ, მზად ვიყავი.

ვფიქრობ, სეზონის მიწურულს დაღლილობა ოდნავ დამეტყო და ჩემი შესაძლებლობების მხოლოდ 50% გამოვამჟღავნე. კიდევ ბევრი შეგვიძლია და ვაგრძელებთ მუშაობას, რომ მივიდე იმ 100%-მდე, რაც მაქვს მიზნად. აუცილებლად იქნება 100%-იც“, - ამბობს გიორგი მამარდაშვილი.

მისი თქმით, იმის მიუხედავად, რომ რთული მეტოქეები ჰყავდათ, საქართველოს ნაკრებმა შეძლო საკუთარი შესაძლებლობების გამოვლენა.

„ყოველთვის ვამბობ - ფეხბურთი იმდენად რთული თამაშია, რომ ყოველთვის შეიძლება რაღაც განსაკუთრებული მოხდეს და ჩემი აზრით, ასეც მოხდა. რთული მეტოქეები გვყავდა და რთულ ჯგუფში ვიყავით, მაგრამ გამოვავლინეთ ის ძალა და სულისკვეთება, რაც გვაქვს ქართველებს და მოვახერხეთ ჯგუფიდან გასვლა.

რა თქმა უნდა, რთული თამაშები გამოვიდა და მიხარია, რომ მთლიანმა გუნდმა კარგად ითამაშა. როცა თითოეული ფეხბურთელი კარგად თამაშობს, შემდეგ მეც მიმარტივდება ხოლმე თამაში და დიდი მადლობა მათ იმ თავდაუზოგავი შრომისთვის, რაც იყო ამ ოთხი თამაშის განმავლობაში“, - აღნიშნავს მამარდაშვილი.

შეგახსენებთ, მამარდაშვილმა EURO2024-ზე ყველაზე მეტი, 30 მოგერიება დააგროვა, რაც ტურნირის ისტორიაში მეორე საუკეთესო შედეგია 2008 წელს, იგორ აკინფეევის მიერ შესრულებული 32 „სეივის“ შემდეგ.