„თუ ჩვენ ნატოს რაკეტებით შეგვიტევენ, რუსეთს უფლება აქვს, კიევს და ნატოს ობიექტებს ბირთვული იარაღით უპასუხოს“ - მედვედევი

„რუსეთის ახალი ბირთვული დოქტრინა ნიშნავს, რომ თუ ნატოს რაკეტებს რუსეთს ესვრიან, რუსეთის ფედერაციას უფლება ექნება, რომ კიევს და ნატოს საკვანძო ობიექტებს ბირთვული იარაღით უპასუხოს და მნიშვნელობა არ აქვს, ეს ობიექტები სად იქნება განთავსებული“. ამის შესახებ რუსეთის უშიშროების საბჭოს თავმჯდომარის მოადგილემ დიმიტრი მედვედევმა X-ში დაწერა.

მედვედევი ამბობს, რომ მოვლენათა ამ სცენარით განვითარება მესამე მსოფლიო ომს ნიშნავს.

ცნობისთვის, რუსეთის პრეზიდენტმა ვლადიმერ პუტინმა დღეს ხელი მოაწერა განკარგულებას განახლებული ბირთვული დოქტრინის - ბირთვული შეკავების სფეროში სახელმწიფო პოლიტიკის საფუძვლების დამტკიცების შესახებ.

ახალი დოქტრინის მიხედვით, ბირთვული იარაღი არის უკიდურესი ზომა ქვეყნის სუვერენიტეტის დასაცავად.

ბირთვულ დოქტრინაში აღნიშნულია, რომ რუსეთი იტოვებს უფლებას, გამოიყენოს ბირთვული იარაღი მის ან მისი მოკავშირეების წინააღმდეგ მასობრივი განადგურების იარაღის გამოყენების საპასუხოდ.

„ნებისმიერი არაბირთვული სახელმწიფოს აგრესია, მაგრამ ბირთვული ქვეყნის მონაწილეობით ან მხარდაჭერით, ჩაითვლება ერთობლივ თავდასხმად რუსეთის ფედერაციაზე“, - აღნიშნულია დოკუმენტში. 

Russia's new nuclear doctrine means NATO missiles fired against our country could be deemed an attack by the bloc on Russia. Russia could retaliate with WMD against Kiev and key NATO facilities, wherever they're located. That means World War III.

— Dmitry Medvedev (@MedvedevRussiaE) November 19, 2024