კოტე ჟღენტი: ევროკავშირის ხელმძღვანელობამ უნდა გააკეთოს ერთადერთი რამ - ქვეყანაში მიმდინარე პროცესებს, მოვლენებს შეხედოს რეალურად და არა აღქმების საფუძველზე, რისი იმედიც მე ნაკლებად მაქვს

ევროკავშირის ხელმძღვანელობამ უნდა გააკეთოს ერთადერთი რამ - ქვეყანაში მიმდინარე პროცესებს, მოვლენებს შეხედოს რეალურად და არა აღქმების საფუძველზე, რისი იმედიც მე ნაკლებად მაქვს, - განაცხადა გადაცემაში „EURO ანატომია“ „ერთიანი ნეიტრალური საქართველოს“ მრჩეველმა საერთაშორისო პოლიტიკის საკითხებში, კოტე ჟღენტმა.

აღნიშნული განცხადებით მან უპასუხა გადაცემის წამყვანის კითხვას: „შავი ზღვის წყალქვეშა კაბელისა და აბრეშუმის გზის პროექტების მნიშვნელობის გათვალისწინებით, ევროკავშირს ისევ სჭირდება საქართველო და ცხადია, საქართველოსაც ევროპა. ურთიერთობების გადასატვირთავად რა უნდა გააკეთოს ევროკავშირის ხელმძღვანელობამ და რა საქართველოს ხელისუფლებამ?“

როგორც კოტე ჟღენტმა აღნიშნა, შესაძლოა „ევრომორწმუნეებს“ ამის სჯერათ, მაგრამ მას არ სჯერა, რომ ხილულ მომავალში ე.წ. ევრობიუროკრატია შეიცვლება.

მისივე თქმით, თუ რეალურად შეხედავენ საქართველოში არსებულ ვითარებას და თავს დაანებებენ აგენტების გზავნილებზე დაყრდნობით ანგარიშების შექმნას, სიტუაცია შესაძლოა, მაშინ შეიცვალოს.

„ვიმეორებ, მე ამის იმედი არ მაქვს. საქართველოს რაც შეეხება, უნდა გამოვიდეს ევროილუზიიდან.

ეს პროექტები [შავი ზღვის წყალქვეშა კაბელისა და აბრეშუმის გზის] განხორციელდება, იქ რაიმე რადიკალური ცვლილება მოხდება თუ არა, ვინაიდან ჩვენ ახლა ვართ და საკმაო ხანს დავრჩებით, ერთადერთ გზად, რომელიც უზრუნველყოფს ეკონომიკურ აქტივობას აღმოსავლეთიდან დასავლეთისკენ. ეს ჩვენზე გავლით ხორციელდება და ჩვენზე გავლით იქნება, მით უმეტეს კაბელი [შავი ზღვის], რომელიც ახლა შეიტანეს პრიორიტეტებში. ჩრდილოეთის გზა კარგა ხანს იქნება დაკეტილი, სამხრეთის გზაც ცნობილი მოვლენების გამო. ამიტომ, ჩვენ დავრჩებით“, - აღნიშნა მან.