კანადის პრემიერ-მინისტრი: კანადა ევროკავშირის პირველი ასოცირებული წევრი გახდება

კანადის პრემიერ-მინისტრმა მარკ კარნიმ განაცხადა, რომ მისი ქვეყანა და ევროკავშირი მუშაობენ პარტნიორობის კიდევ უფრო გაღრმავებაზე, რაც კანადას ევროკავშირის პირველი ასოცირებული წევრის სტატუსის მოპოვებაში დაეხმარება. ამის შესახებ კანადის მთავრობის განცხადებაშია ნათქვამი.

„ერთად, კანადა და ევროკავშირი ოჯახებს უფრო მეტ არჩევანსა და დაბალ ხარჯებს შესთავაზებენ, ბიზნესებს - ახალ საექსპორტო ბაზრებს, ხოლო ახალგაზრდებს - მეტ შესაძლებლობას, იცხოვრონ, იმუშაონ და ისწავლონ იქ, სადაც აირჩევენ - კანადაში თუ ევროკავშირში“, - ნათქვამია მთავრობის განცხადებაში.

მონრეალში ორმხრივი სამიტის შემდეგ, კარნიმ განაცხადა, რომ კანადა და ევროკავშირი აპირებენ ოტავას ბლოკში პოტენციურ ასოცირებულ წევრობაზე მოლაპარაკებების დასრულებას 2027 წლის ივნისამდე.

„პარალელურად, კანადა და ევროკავშირი მუშაობენ რაც შეიძლება ღრმა პარტნიორობისკენ - გაწევრიანების გარდა და კანადა გახდება ევროკავშირის პირველი ასოცირებული წევრი. მომდევნო თვეების განმავლობაში კანადა და ევროკავშირი განსაზღვრავენ წევრობის ამ ფორმის არსს, მასშტაბსა და ჩარჩოს“, - ნათქვამია განცხადებაში.

ევროპული საბჭოს პრეზიდენტმა ანტონიო კოსტამ სამიტზე განაცხადა, რომ კანადა „არაევროპულ ქვეყნებს შორის ყველაზე ევროპულია“.