გურამ მაჭარაშვილი: ორი დღის წინ აშშ-ის სახელმწიფო მდივანმა მარკო რუბიომ USAID-ს თაღლითი ორგანიზაცია უწოდა და დახურა. ეს არის პასუხი მათ პრეტენზიებზე, ვისაც NGO-ების ანგარიშების დაყადაღებასთან დაკავშირებით აქვს რაიმე პრეტენზიები

 „ხალხის ძალის“ აღმასრულებელი მდივანი გურამ მაჭარაშვილი „არჩევნების მონიტორინგის ორგანიზაციების ევროპული ქსელის“ (ENEMO) მიერ გაკეთებულ განცხადებას ეხმიანება და აღნიშნავს, რომ მათთვის, ვისაც NGO-ების ანგარიშების დაყადაღებასთან დაკავშირებით აქვს რაიმე ტიპის პრეტენზიები, მარტივი პასუხი ამერიკის სახელმწიფო მდივნის მარკო რუბიოს განცხადებაა, სადაც USAID-ს თაღლითი ორგანიზაცია უწოდა.

„ორი დღის წინ ამერიკის სახელმწიფო მდივანმა მარკო რუბიომ USAID-ს თაღლითი ორგანიზაცია უწოდა და დახურა. ეს არის ძალიან მარტივი პასუხი მათ პრეტენზიებზე, ვისაც NGO-ების ანგარიშების დაყადაღებასთან დაკავშირებით აქვს რაიმე ტიპის პრეტენზიები. თავად ამერიკაში, ამერიკის პრეზიდენტი და სახელმწიფო მდივანი თაღლითებს უწოდებს USAID-ს და ოფიციალურად ხურავს“, - აღნიშნა გურამ მაჭარაშვილმა.

არასამთავრობო ორგანიზაციების ანგარიშებზე დადებული ყადაღის გაუქმებას ხელისუფლებას ამჯერად, „არჩევნების მონიტორინგის ორგანიზაციების ევროპული ქსელი“ (ENEMO)მოუწოდებს. ამ ქსელის წევრი ორგანიზაცია „სამართლიანი არჩევნებია“, რომლის ანგარიში კიდევ 6 ორგანიზაციასთან ერთად, პროკურატურის მტკიცებით იმ მიზეზით დაყადაღდა, რომ არსებობს ეჭვი საბოტაჟის მცდელობის, მტრულ საქმიანობაში დახმარებისა და კონსტიტუციური წყობის წინააღმდეგ მოქმედებაში მონაწილეობის.