"დაე, ისე მოხდეს, რომ თქვენი ერთი წლის შემოსავალი მთლიანად მე ჩამერიცხოს და თქვენ აზრზე არ იყოთ, ფული სად წავიდა!" - ალეკო შუღლაძე GWP-ს მიმართავს

მწერალი, ალეკო შუღლაძე სოციალურ ქსელში თბილისში სასმელი წყლის მიწოდების შეწყვეტას ეხმაურება და წერს:

"იცით, როგორ გავიქეცი, ძალიან სწრაფად, თავქუდმოგლეჯილი, ფეხებს წელზე კი არა, კისერში ვირტყამდი, ორი ქუჩის ძაღლი ამედევნა ყეფით, ერთად გავრბოდით, თან წვიმა მოდიოდა თან გული ამომივარდა, სტენოკარდია დამეწყო.

მაწონი მქონდა ნაყიდი, მესიჯი რომ მომივიდა, წყალი დაწყდებაო და ფული არც გადამიხდია, ისე გამოვარდი მაღაზიიდან, გამყიდველი დამედევნა, კიდევ ვიღაც არამკითხე მოხალისე…

ლიფტში ღმერთს ვთხოვდი, ოღონდ ახლა არ გავიჭედო, ახლა არ გავიჭედო-მეთქი და გადავრჩი.

მაგრამ მერე ხელი მიკანკალებდა და გასაღებს ვეღარ ვურჭობდი საკეტში, როგორც იქნა გავურჭე, შევვარდი, მაგრამ ვერ მივუსწარი, წყალი უკვე დაწყვეტილი იყო…

მაპატიეთ, შვილებო!

ააააააა!

ვღრიალებ!

ჯორჯიან უოთერ ენდ ფაუერი • Georgian Water and Power

დაე, ისე მოხდეს, რომ თქვენი ერთი წლის შემოსავალი მთლიანად მე ჩამერიცხოს და თქვენ აზრზე არ იყოთ, ფული სად წავიდა!

უხ, თქვენი! უხ, თქვენი! უხ, თქვენი!",- წერს შუღლაძე.

„ჯორჯიან უოთერ ენდ ფაუერის“ ინფორმაციით, მცხეთა-მთიანეთის რაიონში ძლიერი წვიმით გამოწვეულმა უხვმა ნალექმა დატბორა საგურამოს ტერიტორია, მათ შორის დაიტბორა „ჯორჯიან უოთერ ენდ ფაუერის“ საგურამოს სათავე ნაგებობა, რამაც შექმნა სასმელი წყლის ამღვრევის საფრთხე, რის გამოც თბილისის ზოგიერთ ქუჩას წყალმომარაგება დროებით შეეზღუდა.