გერმანელ ექიმს ბრალი 15 პაციენტის მკვლელობაში ედება

ბერლინის პროკურატურამ გერმანელ ექიმს ბრალი 15 პაციენტის მკვლელობაში წაუყენა. 40 წლის ეჭვმიტანილმა, 2021 წლის სექტემბრიდან 2024 წლის ივლისამდე, 12 ქალი და 3 მამაკაცი, სასიკვდილო ნარკოტიკების კოქტეილის გამოყენებით მოკლა. როგორც BBC იუწყება, ბრალდებულმა კვალის დაფარვის მიზნით, მსხვერპლების სახლებს ცეცხლი წაუკიდა.

პროკურატურის მიერ გამოქვეყნებულ განცხადებაში ნათქვამია, რომ ექიმი დანაშაულს არ აღიარებს. მიუხედავად ამისა, მისი ვინაობა არ სახელდება, გამომდინარე გერმანიაში არსებული კონფიდენციალურობის მკაცრი კანონისა.

„ეჭვმიტანილი საანესთეზიო და მიორელაქსანტ პრეპარატებს იყენებდა, რამაც პაციენტების სასუნთქი კუნთების პარალიზება გამოიწვია. შესაბამისად, ამას მათი სუნთქვის გაჩერება და სიკვდილის დადგომა მოყვა“, - ნათქვამია პროკურატურის განცხადებაში.

ბრალდებული გერმანიის რამდენიმე შტატში მუშაობდა. მისი მსხვერპლების ასაკი 25-დან 94 წლამდე მერყეობს. ვარაუდობენ, რომ ეჭვმიტანილმა საკუთარი პაციენტების ბინებს, ხუთ სხვადასხვა შემთხვევაში, ცეცხლი წაუკიდა. ამით, ექიმი კვალის დაფარვას ცდილობდა.

პროკურორები აღნიშნავენ, რომ მსხვერპლთა რაოდენობა, დიდი ალბათობით, გაიზრდება. 40 წლის ეჭვმიტანილს კი, „პროფესიული საქმიანობის სამუდამო აკრძალვა“ და პატიმრობა ემუქრება. საქმის გამოძიების დასრულებამდე, ბრალდებული პატიმრობაში რჩება.