აშშ საქართველოში ხელისუფლების შეცვლას გეგმავს - რუსული დაზვერვა

ვაშინგტონს მტკიცედ სურს, რომ საქართველოში ხელისუფლების ცვლილება მოხდეს და ამის მიღწევას ოქტომბრის საპარლამენტო არჩევნების შემდეგ შეეცდება, ამისთვის კი აშშ-ის ადმინისტრაციაში შემუშავებულია სპეციალური კამპანია „ქართული ოცნების“ დისკრედიტაციის მიზნით. ამის შესახებ სააგენტო „ტასი“ რუსეთის საგარეო დაზვერვის სამსახურზე დაყრდნობით იუწყება.

„საგარეო დაზვერვის სამსახურის“ მიერ მოპოვებული ინფორმაციის მიხედვით, ვაშინგტონს მტკიცედ აქვს გადაწყვეტილი საქართველოში ხელისუფლების შეცვლა 26 ოქტომბრის საპარლამენტო არჩევნების შედეგების მიხედვით. აშშ-ის პრეზიდენტის, ჯო ბაიდენის ადმინისტრაციაში უკვე შემუშავებულია მასშტაბური საინფორმაციო კამპანია მმართველი პარტიის, „ქართული ოცნების“ დისკრედიტაციის მიზნით“, - განაცხადეს რუსეთის საგარეო დაზვერვის სამმართველოს პრესსამსახურში.

„ტასი“ წერს, რომ 9 ივლისს საქართველოს პრეზიდენტმა სალომე ზურაბიშვილმა ფეისბუკში საქართველოს ხელისუფლების პოლიტიკა გააკრიტიკა აშშ-სა და ევროკავშირთან მიმართებით და მას „გაუაზრებელი და მტრული“ უწოდა. ზურაბიშვილმა ასე შეაფასა ქართულ-ამერიკული სამხედრო წვრთნების, „ღირსეული პარტნიორი-2024“-ის გაუქმება და ევროკავშირის გადაწყვეტილება საქართველოს თავდაცვის სამინისტროსთვის გამოყოფილი 30 მლნ ევროს გაყინვის შესახებ.