იტალიაში თავშესაფრის მთხოვნელთა რიცხვი გაიზარდა - რა სირთულეებს აწყდებიან უცხოელები?!

2022 წელს, იტალიაში თავშესაფრის მთხოვნელთა რიცხვი გასულ წელთან შედარებით, მკვეთრად გაიზარდა. მიმდინარე წლის 1-ელი იანვრიდან 11 ნოემბრის ჩათვლით, ქვეყნის მასშტაბით თავშესაფარი 69 991 უცხოელმა მოითხოვა (გასულ წელს რიცხვი 44 ათასი გახლდათ), აქედან განიხილა, ან განხილვის პროცესშია 50 846 საქმე, მათგან 28 724 პირს ლტოლვილის სტატუსის მინიჭებაზე უარი ეთქვა. 

თავშესაფრის მაძიებელ უცხოელთა უფლებების დამცველი ასოციაციები და ორგანიზაციები, რომლებიც აღნიშნული საქმეების წარმოებაში ეხმარებიან უცხოელებს, აცხადებენ, რომ ყველა პრაქტიკას საერთო უარყოფითი მახასიათებლები აქვს, ესენია ქვესტურების შესაბამის სამსახურთან წვდომის სირთულე უცხოლებისთვის, მოლოდინის რეჟიმის ხანგრძლივობა, არალეგიტიმური განაცხადები. მარტივად რომ ვთქვათ, ბიუროკრატია. 

განსაკუთრებულ პრობლემას წარმოადგენს, პირველ ჯერზე, განაცხადის გასაკეთებლად ქვესტურებში მოხვედრა. ერთი და იგივე სიტუაციაა მილანის, რომის, კატანიის, სალერნოს და ა.შ. ქვესტურებში. ფაქტობრივად, მთელი იტალიის ტერიტორიაზე. მხოლოდ განაცხადის გასაკეთებელად, ხშირად პირს მინიმუმ 4 კვირა უწევს ლოდინი, რაც ნიშნავს, რომ საერთაშორისო დაცვის მისაღებად შანსი საგრძნობლად მცირდება, რაც ევროპულ სტანდარტს, რომელიც თავშესაფრის მაძიებლის ინტერესს და უფლებებს იცავს, პირდაპირ ეწინააღმდეგება. 

სწორედ ამ მიზეზების გამო, ზემოთ აღნიშნულმა უფლებადამცველმა ორგანიზაციებმა საჩივარი დაწერეს და როგორც აცხადებენ, გაჩერებას არ აპირებენ.