თორნიკე რიჟვაძე თურქეთში გადაიყვანეს

თორნიკე რიჟვაძე თურქეთში გადაიყვანეს. აჭარის მთავრობის ყოფილი ხელმძღვანელი მკურნალობას ერთ-ერთ საავადმყოფოში განაგრძობს.

„ქრონიკასთან“ საუბარში პირველი საუნივერსიტეტო კლინიკის კლინიკური დირექტორმა ლალი ტურძელაძემ აღნიშნა, რომ რიჟვაძის თურქეთში გადაყვანა ოჯახის მოთხოვნა იყო.

„ღამის 02:00 საათზე გადაიყვანეს. საჭიროება არ დამდგარა. ოჯახის მოთხოვნით გადავიდა [თურქეთში]. იყო დადებითი დინამიკით. სტაბილურად მძიმე პაციენტი იყო და აპარატზე იყო, გაუმჯობესებული პარამეტრებით“, - აღნიშნა ექიმმა სატელეფონო საუბარში.

პირველი საუნივერსიტეტო კლინიკიდან პაციენტის გაყვანამდე რამდენიმე საათით ადრე, რიჟვაძის ჯანმრთელობის მდგომარეობა სამედიცინო დაწესებულების ხელმძღვანელმა შეაფასა. ლევან რატიანის თქმით, რიჟვაძე სტაბილურად მძიმეა, თუმცა შენარჩუნებულია დადებითი დინამიკა და მართვითი სუნთქვიდან ის მალე უნდა მოიხსნას.

გულმკერდში მიყენებული ცეცხლნასროლი ჭრილობით, აჭარის მთავრობის ყოფილი ხელმძღვანელი კლინიკაში სამი დღის წინ შეიყვანეს.

არსებული ინფორმაციით, კახეთში ალექსანდრე ახვლედიანთან სტუმრად ყოფნის დროს, აჭარის მთავრობის ყოფილმა ხელმძღვანელმა, იარაღით თვითდაზიანება მიიყენა. ტყვიამ ფილტვი დააზიანა.