სალომე ზურაბიშვილმა 28 ოქტომბერს აქცია დააანონსა

საქართველოს პრეზიდენტი საპარლამენტო არჩევნებს არალეგიტიმურს უწოდებს და ხვალ, 19:00 საათზე აქციას აანონსებს.

როგორც სალომე ზურაბიშვილმა პრეზიდენტის სასახლეში, ოპოზიციასთან ერთად გამართულ ბრიფინგზე განაცხადა, არ ჩევნები ტოტალურად გაყალბდა.

„ეს იყო ტოტალური გაყალბება. ტოტალური წართმევა თქვენი ხმების. ტექნოლოგია გამოყენებულ იქნა იმისთვის, რომ გაეთეთრებინა გაყალბება. ჩვენ ვიყავით მოწმე და მსხვერპლი რუსული სპეცოპერაციის. ჰიბრიდული ომის ერთ-ერთი ახალი ფორმის, რომელიც განხორციელდა ჩვენს ხალხზე და ქვეყანაზე. წაგვართვეს არჩევნების უფლება. მე მინდა, როგორც ამ სახელმწიფოში დარჩენილმა ერთადერთმა ინსტუტუტმა ვთქვა, რომ არ ვაღიარებ ამ არჩევნებს. ამ არჩევნების აღიარება არის იგივე, რაც რაც აღიარება რუსეთის აქ შემოსვლის, რუსეთის მიმართ საქართველოს დაქვემდებარების. მე ამისთვის არ ჩამოვსულვარ ქვეყანაში. ამისთვის არ უცხოვრიათ ჩვენ წინაპრებს და ამას ჩვენ არ შევეგუებით. არ შეიძლება, რომ ვინმემ საქართველოს თავისი ევროპული მომავალი წაართვას.

ჩვენ ერთად უნდა დავდგეთ და გამოვაცხადოთ, რომ არ ვაღიარებთ ამ არჩევნებს, არ ვეგუებით რუსეთს და მის შემოსვლას ამ ფორმით საქართველოში. ჩვენ დავდგებით ერთად. ისინი ჩემთან ერთად და მე მათთან ერთად. ყველას მინდა მოგიწვიოთ ხვალ, საღამოს 7 საათზე რუსთაველზე იმისთვის, რომ ჩვენ ერთად ვთქვათ, გამოვუცხადოთ მსოფლიოს, რომ ჩვენ არ ვაღიარებთ ამ არჩევნებს, ვიცავთ კონსტიტუციურ უფლებას“, - განაცხადა სალომე ზურაბიშვილმა.