თეა წულუკიანი: თუ ვიღაც იკითხავს - მოგეთმინათ აპრილამდე, ყოფილიყავით და იქნებ ეს დათქმები შეგესწორებინათ, ამ განხილვებმა აჩვენა, რომ არავითარ ასეთ ძალისხმევას აზრი არ ექნებოდა

„საქართველო აგრძელებს ევროსაბჭოს წევრობას, თანამშრომლობას სხვადასხვა ორგანოში, უბრალოდ ამ მოწვევის პარლამენტის ეს დელეგაცია, ჩვენი შემადგენლობით, სხდომებში მონაწილეობას აღარ მიიღებს“, - ამის შესახებ პარლამენტის ვიცე-სპიკერმა, ევროსაბჭოს საპარლამენტო ასამბლეაში საქართველოს დელეგაციის ხელმძღვანელმა თეა წულუკიანმა „ქრონიკასთან“ საუბრისას განაცხადა.

წულუკიანის განცხადებით, საქართველოს საპარლამენტო დელეგაციის მიერ ევროსაბჭოს საპარლამენტო ასამბლეაში მუშაობის შეწყვეტის გადაწყვეტილება გარდაუვალი იყო.

„საჯაროდ გამოცხადებამდე ამ გადაწყვეტილების შესახებ შევატყობინე როგორც თავად ასამბლეის გენერალურ მდივანს, ასევე პრეზიდენტს და ევროპის საბჭოს გენერალურ მდივანს. მათ ეს გადაწყვეტილება მიიღეს ცნობად, გამოხატეს წუხილი. თუ ვიღაც იკითხავს - მოგეთმინათ აპრილამდე, ყოფილიყავით და იქნებ ეს დათქმები შეგესწორებინათ, შეგეგნებინებინათ და ა.შ. ამ განხილვებმა აჩვენა, რომ ასეთ არავითარ ძალისხმევას აზრი არ ექნებოდა. ყველას, ვინც შეიძლება გააკრიტიკოს ეს გადაწყვეტილება, მინდა ვუთხრა, რომ საქართველოს სახელმწიფო ევროსაბჭოს წევრია.

ჩვენი გადაწყვეტილება არავითარ შემთხვევაში ამ საკითხს არ ეხება. საქართველო აგრძელებს ევროსაბჭოს წევრობას, თანამშრომლობას სხვადასხვა ორგანოში, უბრალოდ ამ მოწვევის პარლამენტის ეს დელეგაცია, ჩვენი შემადგენლობით, სხდომებში მონაწილეობას აღარ მიიღებს. ეს გარდაუვალი გადაწყვეტილება იყო. სხვა მხრივ, ჩვენი ამომრჩეველი აუცილებლად იქნებოდა იმედგაცრუებული და ვერ გაიგებდა. როგორც სახელმწიფო, ევროსაბჭოში წევრობას ვაგრძელებთ. ამ ორგანიზაციაში უამრავი სხვა ორგანოა, დაწყებული სასამართლოდან, გაგრძელებული მინისტრთა კომიტეტით, სადაც ჩვენი შესანიშნავი ელჩი საქმიანობას გააგრძელებს“, - აცხადებს თეა წულუკიანი.