„მკურნალობის პროცესი კარგად მიმდინარეობს, მსუბუქი ვარჯიში და ძუნძული უკვე დავიწყე“- რას ჰყვება ანზორ მექვაბიშვილი

 ახალგაზრდა ნახევარმცველს ანზორ მექვაბიშვილს ევროპის ჩემპიონატზე ყველაზე საპასუხისმგებლო მისია შეხვდა - შეცვალა საქართველოს ნაკრების ხერხემალი ოთარ კიტეიშვილი. ამ მისიას მექვაბიშვილმა თავი ბრწყინვალედ გაართვა და კარგი მატჩები ჩაატარა.

მექვაბიშვილი რუმინულ „კრაიოვაშიც“ სტაბილურად თამაშობდა, გოლიც გაიტანა, თუმცა აგვისტოს ბოლოს მძიმე ტრავმა მიიღო და იმის შემდეგ, არ უთამაშია. 11 ტურის შემდეგ, მექვაბიშვილის გუნდი 19 ქულით მეორე პოზიციაზეა და ჩემპიონობისთვის იბრძვის.

ევრო 2024-ზე მან ჩეხეთთან და თურქეთთან ძირითად შემადგენლობაში ითამაშა, პორტუგალიასთან კი შეცვლაზე შევიდა. დაფარულ მანძილებში მექვაბიშვილმა ერთ-ერთი ყველაზე მაღალი შედეგი დააფიქსირა.

გამოცემა LaGazzetta.ge-სთან ინტერვიუში, ანზორ მექვაბიშვილმა საკუთარ ჯანმრთელობის მდგომარეობაზე ისაუბრა:

 „მკურნალობის პროცესი კარგად მიმდინარეობს, მსუბუქი ვარჯიში და ძუნძული უკვე დავიწყე, მალე ბურთთან ერთად ვარჯიშსაც განვაახლებ. უახლოეს მომავალში ფეხზე კიდევ ერთხელ შემამოწმებენ და ამის შემდეგ მეცოდინება, როდის დავუბრუნდები მოედანს.

ეს პერიოდი მენტალურად საკმაოდ რთული იყო, მაგრამ ყველაფერი მალევე გავათვითცნობიერე და ტრავმის მიღებიდან რამდენიმე დღეში უკვე ფიქრი იმაზე დავიწყე, რომ რაც შეიძლება მალე დავბრუნდე. რთულია, როცა ტრავმას ისეთ პერიოდში იღებ, როცა თამაშობ და ფორმაში ხარ, თუმცა ტრავმაც ფეხბურთის ნაწილია. ჩემი მიზანია, მოედანს რაც შეიძლება მალე დავუბრუნდე და კვლავ ძველებურად ვითამაშო“, - აღნიშნა მექვაბიშვილმა.