„შრომაჰოლიკი, დიდი პოტენციალით“ - ყოფილი თანაგუნდელები ზურიკო დავითაშვილზე

„შრომაჰოლიკი, დიდი პოტენციალით“ - ასე ახასიათებენ „სენტ-ეტიენის“ ქართველ შემტევ ნახევარმცველს მისი ყოფილი თანაგუნდელები „ბორდოდან“.

„მან გაიბრწყინა ჩემპიონატის ბოლო მატჩში ოსერთან და ბომბარდირთა დავაში ჩაება 3 გოლითა და წინა მატჩებში გაკეთებული 2 საგოლე გადაცემით. ამ დროისთვის ზურიკო დავითაშვილი „სენტ-ეტიენის“ ყველაზე შედეგიანი მოთამაშეა. მან 1მწვანეების“ მიერ გატანილი 6 გოლიდან 5-ში მონაწილეობა მიიღო. 90 Football ზურიკოს პორტრეტის შექმნას ბორდოში მისი ყოფილი თანაგუნდელების დახმარებით შეეცადა“, - წერს სენტ ეტიენის ფანსაიტი და თანაგუნდელების კომენტარებს აქვეყნებს.

„ამ ბიჭს შეუძლია მოედანზე აჩვენოს თავისი შესაძლებლობები და სულაც არ სჭირდება ამაზე მის მიღმა საუბარი. მასთან ერთად გასახდელში გატარებული ყოველი დღე სასიამოვნოა. ძალიან უპრობლემო ადამიანია, რომელსაც აქვს თავისი პირადი, ოჯახური ცხოვრება. არის გულღია, თავმდაბალი ადამიანი, რომელიც თავის კუთხეში თავისთვის საქმიანობს. მახსოვს, ყოველ დილით როგორ მოდიოდა და მუშაობდა საკუთარ თავზე. მე პედრო დიასთან ერთად ბევრს ვვარჯიშობდი სტანდარტულების შესრულებაზე, ის კი მოვიდოდა ხოლმე, აიღებდა ბურთს, დაარტყამდა ზუსტად „ცხრიანში“ და წავიდოდა (იცინის).

მას უდიდესი პოტენციალი აქვს და კარგად ესმის ფეხბურთი. არის გონიერი და ფლობს ბრწყინვალე ფიზიკურ მახასიათებლებს. ყველაზე მეტად აღმაფრთოვანებდა ის, თუ როგორ უმკლავდებოდა მეტოქეებს. მას შეუძლია მოატყუოს ყველა და ყოველთვის! ჩემი აზრით, ერთადერთი, რაც ზურიკოს სჭირდება, ბურთის საჭირო მომენტში დარტყმაა. ის არის ფეხბურთელი, რომელიც უდიდეს წარმატებას მიაღწევს, თუკი გააგრძელებს თავდაუზოგავად მუშაობას“, - აცხადებს კლემან მიშლენი.

„ის ძალიან შრომისმოყვარეა. ყოველთვის ადრიანად მოდიოდა სავარჯიშო დარბაზში, აკეთებდა მოთელვას. ვარჯიშის დასრულების შემდეგაც რჩებოდა ხოლმე მოედანზე და ვარჯიშობდა კარში დარტყმაზე. ამით მან ძალიან დიდ პროგრესს მიაღწია“, - აღნიშნავს მალკომ ბოკელე.

„ვერასდროს ნახავდი, მას დასასვენებლად ჩამომჯდარს. მახსოვს, ერთხელ კლუბში კვირა დღეს, სამკურნალო კურსისთვის მივედი. ის იქ დამხვდა, ვარჯიშობდა. როგორც წესი, შემტევი ფეხბურთელები, შედარებით უფრო თავქარიანები და დაუდევრები არიან, ის კი ძალიან მიზანსწრაფულია და სულ მუშაობს“, - აცხადებს ჟაკ ეკომი.