თურქეთის ხელისუფლებამ კორუფციის ბრალდებით სტამბოლის მუნიციპალიტეტის 50-მდე თანამშრომელი დააკავა

თურქეთის ხელისუფლებამ კორუფციის ბრალდებით სტამბოლის მუნიციპალიტეტის 47-დან 50-მდე თანამშრომელი დააკავა. ამის შესახებ Deutsche Welle წერს.

მედიის ცნობით, დაკავებები ოპოზიციაზე ზეწოლისა და ქალაქის ყოფილი მერის, ექრემ იმამოღლუს კორუფციის საქმეზე გამოძიების ფონზე მოხდა.

ქვეყნის ხელისუფლების მიერ გამოცემული ბრძანების თანახმად, 53 ადამიანი დააკავეს. სახელმწიფო საინფორმაციო სააგენტო „ანადოლუს“ ცნობით, დაკავებები სტამბოლის, ანკარისა და თექირდაღის პროვინციებში ჩატარებული ოპერაციების დროს განხორციელდა.

დაკავებულებს შორის არიან სტამბოლის მუნიციპალიტეტის გენერალური მდივანი, იმამოღლუს ოფისის ხელმძღვანელი, წყალმომარაგებისა და კანალიზაციის სააგენტოს (ISKI) თავმჯდომარე და მისი მოადგილე, ასევე, ISKI-ის ერთ-ერთი დეპარტამენტის ხელმძღვანელი, იტყობინება თურქული ტელეარხი NTV.

ტელეარხის ცნობითვე, თურქეთის ხელისუფლებამ ასევე დააკავა იმამოღლუს თანაშემწის, მურატ ონგუნის მეუღლე. დაკავებულებს შორის იმამოღლუს პირადი მცველიცაა.

ინფორმაციისთვის, სტამბოლის ყოფილი მერი, თურქეთის პრეზიდენტ რეჯეფ თაიფ ერდოღანის მთავარი პოლიტიკური კონკურენტი ექრემ იმამოღლუ 19 მარტს დააკავეს, რასაც ქვეყანაში საპროტესტო აქციების ტალღა მოჰყვა. მისი დაპატიმრების შემდეგ სულ მცირე 150-მდე ადამიანი დააკავეს.

ექრემ იმამოღლუ სასამართლოს წინაშე პირველად 11 აპრილს წარდგა. მას ქალაქის მთავარი პროკურორის შეურაცხყოფასა და მუქარაში დებენ ბრალს, რის გამოც შვიდი წლითა და ოთხი თვით თავისუფლების აღკვეთა ემუქრება.

პირველ მოსმენაზე იმამოღლუმ უარყო ბრალდება და დასძინა, რომ მის წინააღმდეგ ყველა სარჩელი პოლიტიკურად მოტივირებულია.

„აქ იმიტომ ვარ, რომ სტამბოლში სამი არჩევნები მოვიგე. აქ ვარ, რადგან [თურქეთში მცხოვრები] 86 მილიონი ადამიანის გულში პრეზიდენტი ვარ“, - განაცხადა მან.

საქმეზე შემდეგი სასამართლო სხდომა 16 ივნისს არის ჩანიშნული.