თენგიზ შარმანაშვილი დიდი ბრიტანეთის ელჩის განცხადებაზე: ყალბი ნარატივები ააგო, თურმე მზია ამაღლობელს სისხლის სამართლის დანაშაული არ ჩაუდენია და სიტყვის თავისუფლებისთვის დააკავეს, წარმოუდგენელია

„ყალბი ნარატივები ააგო, თურმე მზია ამაღლობელს სისხლის სამართლის დანაშაული არ ჩაუდენია და სიტყვის თავისუფლებისთვის დააკავეს, წარმოუდგენელია“, - ასე ეხმაურება პარლამენტის თავდაცვისა და უსაფრთხოების კომიტეტის თავმჯდომარის პირველი მოადგილე თენგიზ შარმანაშვილი საქართველოში დიდი ბრიტანეთისა და ჩრდილოეთ ირლანდიის გაერთიანებული სამეფოს საგანგებო და სრულუფლებიანი ელჩის გარეტ უორდის განცხადებას.

მისი თქმით, საუბარი იმაზე, რომ დანაშაული საერთოდ არ მომხდარა, არასწორია.

„მზია ამაღლობელის თემაზე დავხუროთ საუბარი. თუ ჩვენ მხოლოდ იმაზე ვსაუბრობთ, რომ დანაშაულის ჩამდენ ქალბატონს, რამდენად ჰუმანურად უნდა მოეპყროს სასამართლო, ეს აბსოლუტურად სხვა თემაა და პოლიტიკოსების განსასაზღვრი არაა. მაგრამ საუბარი, რომ დანაშაული საერთოდ არ მომხდარა, ეს არის არასწორი, ტყუილი.

ჩვენ კიდევ რას ვეუბნებით, არანაირი პრობლემა არა გვაქვს თქვენთან ურთიერთობის, თქვენს ინტერესებსაც გავითვალისწინებთ, მაგრამ თქვენც გაითვალისწინეთ ჩვენი ინტერესები.

ყალბი მტკიცებულებები მოიტანო, ან ასეთი ყალბი ნარატივები ააგო, რომ თურმე მზია ამაღლობელს სისხლის სამართლის დანაშაული არ ჩაუდენია და სიტყვის თავისუფლებისთვის დააკავეს, არის ყოვლად წარმოუდგენელი და ღიმილის მომგვრელი.

არავინ მას არ დაიჭერს სიტყვის თავისუფლებისთვის და კრიტიკისთვის, არც კი შეავიწროებენ. ახლა იმიტომ, რომ შენ ჟურნალისტის სტატუსი გაქვს, წახვიდე და სისხლის სამართლის დანაშაული ჩაიდინო და ამაზე თვალი დახუჭონ, არ მოხდება“, - აღნიშნავს მმართველი გუნდის დეპუტატი.

ცნობისთვის, საქართველოში დიდი ბრიტანეთისა და ჩრდილოეთ ირლანდიის გაერთიანებული სამეფოს საგანგებო და სრულუფლებიანი ელჩი, გარეტ უორდი ვიდეომიმართვას ავრცელებს, რომელშიც ამბობს, რომ მედიის თავისუფლების კოალიციის მრავალი წევრი განსაკუთრებით შეშფოთებულია საქართველოში მედიის თავისუფლების გაუარესებით, მათ შორის, მისი შეფასებით, ხელისუფლების კრიტიკის გამო ჟურნალისტ მზია ამაღლობელის პოლიტიკურად მოტივირებული პროცესით.