2 კვირის გაუჩინარებული 23 წლის ახალგაზრდა ცოცხალი იპოვეს

23 წლის ჰადი ნაზარი, რომელიც 13 დღის წინ ავსტრალიაში, ახალი სამხრეთი უელსის შტატში ლაშქრობისას გაუჩინარდა, ცოცხალი იპოვეს. ამის შესახებ ინფორმაციას BBC ავრცელებს.

გამოცემის ცნობით, სამედიცინო უნივერსიტეტის სტუდენტი თითქმის ორი კვირის განმავლობაში კენკრითა და შვრიის ფანტელებით იკვებებოდა.

ჰადი ნაზარის კვალი მას შემდეგ დაიკარგა, რაც ის მეგობრებთან ერთად ლაშქრობის დროს, კოსციუშკოს ეროვნულ პარკში, დათოვლილი მთების ფოტოების გადასაღებად გაემართა.

მის სამძებრო სამუშაოებში ასობით ადამიანი, მათ შორის, ახალგაზრდის მეგობრები და ოჯახის წევრები იყვნენ ჩართული.

„მას ოთხშაბათს, სხვა მოლაშქრეებმა მიაგნეს, როდესაც ნაზარიმ ტურისტებს დაუძახა და უთხრა, რომ დაკარგული იყო და სწყუროდა“, - ნათქვამია ინფორმაციაში.

მას შემდეგ, რაც ტურისტებმა საგანგებო სიტუაციების სამსახურში დარეკეს, ჰადი ნაზარი ვერტმფრენით საავადმყოფოში გადაიყვანეს.

როგორც რეპორტიორებს სამძებრო სამუშაოების ზედამხედველმა ენდრიუ სპლიტმა განუცხადა, სტუდენტს მნიშვნელოვანი დაზიანებები არ აღენიშნებოდა და კონტაქტური იყო.

როგორც აღმოჩნდა, მან მთებში არსებულ ქოხში შვრიის მარცვლებისგან დამზადებული 2 ბატონი იპოვა, „რაც ორი კვირის განმავლობაში, მისი ძირითადი საკვები იყო“.

მისივე თქმით, მოლაშქრე მდინარის წყალს სვამდა და საჭმელად ვარგის კენკრას აგროვებდა.

ჰადი ნაზარი ლურჯი ტბის მახლობლად, იმ ბანაკიდან დაახლოებით 10 კილომეტრში იპოვეს, სადაც 26 დეკემბერს თავის მეგობრებს უნდა შეხვედროდა.

„ამ დროის განმავლობაში, მან საკმაოდ გრძელი გზა განვლო“, - აღნიშნა ენდრიუ სპლიტმა.

მისივე თქმით, მას შემდეგ, რაც ახალგაზრდას საავადმყოფოდან გაწერენ, მას პოლიციელები გამოკითხავენ.