გიორგი ჩაკვეტაძე დასახელდა 5 მოთამაშეს შორის, რომლებიც იანვარში შესაძლოა, პრემიერ ლიგაში გადავიდნენ - „მზად არის უმაღლეს დონეზე თამაშისთვის“

 premierleague.com-ზე გამოქვეყნდა სტატია, რომელშიც ყოფილი ფეხბურთელი და ამჟამად, სპორტის ჟურნალისტი ადრიან კლარკი ასახელებს ხუთ სპორტსმენს, რომლებიც შესაძლოა, იანვარში პრემიერ ლიგაში გადავიდნენ.

ჩამონათვალში მოხვდა გიორგი ჩაკვეტაძე, რომელიც ამჟამად, ინგლისურ კლუბ „უოტფორდში“ თამაშობს.

როგორც პრემიერ ლიგის ოფიციალურ საიტზე ვკითხულობთ, 25 წლის ქართველი უკვე მზადაა, ინგლისის საფეხბურთო ლიგის ჩემპიონატიდან სათამაშოდ პრემიერლიგაში გადავიდეს.

„საქართველოს ნაკრების ფეხბურთელი „უიტფორდის“ გულშემატკივრებს ყოველ ჯერზე აღაფრთოვანებს, როდესაც ბურთით არის. ეს 25 წლის მოთამაშე, რომელიც ბრწყინვალე „დრიბლინგს“ ფლობს, გამუდმებით გვერდს უვლის მეტოქე მცველებს და დასკვნით ფაზაშიც ყოველთვის ახერხებს თამაშის გამწვავებას.

ჩაკვეტაძემ, რომელიც უფრო მომენტების შემქმნელია, ვიდრე ბომბარდირი, მიმდინარე სეზონში 57 საგოლე მომენტი შექმნა, რაც ჩემპიონატში საუკეთესო მაჩვენებელია. შემტევი ნახევარმცველი მარცხენა ფრთაზე, „ათიანის” როლში მოქმედებს, თამაშში საკვანძო 45 პასით კი ის დივიზიონის რეიტინგის სათავეშია. თვალშისაცემია სტანდარტული დარტყმების გათამაშების დროს ჩაკვეტაძის ჩართულობაც.

ჩაკვეტაძე შრომისმოყვარე, გუნდური მოთამაშეა, რომელიც კარგად არის ჩართული პრესინგში. მომენტების შექმნის ჯადოსნური უნარი ჩაკვეტაძეს განსაკუთრებულ ტალანტად აქცევს და გასაკვირი არ არის, რომ პრემიერლიგის კლუბები ქართველით დაინტერესებულები არიან.

სწორედ მისი ტალანტიდან გამომდინარე, შეიძლება ითქვას, რომ ის, უმაღლეს დონზე თამაშისთვის მზადაა”, - ვკითხულობთ სტატიაში.