„ჯგუფებმა, რომლებიც მაშინ ბაიდენის ადმინისტრაციას იყვნენ ამოფარებულები, ახლა გადაინაცვლეს ბალტიისპირეთის მიმართულებით - მათი ამოცანაა, გაგვაშაონ, სანქციები დაგვიწესონ და შემდეგ აგენტურა დასვან აქ“ - ირაკლი ზარქუა

საპარლამენტო უმრავლესობის წევრი ირაკლი ზარქუა ეხმაურება მამუკა მდინარაძის Facebook პოსტს, სადაც საპარლამენტო უმრავლესობის ლიდერი წერს, რომ ბოლო პერიოდში საქართველოს ლეგიტიმურად არჩეულ ხელისუფლებასთან მიმართებით ევროკავშირის წევრი არაერთი ქვეყანა განსაკუთრებულ აგრესიას გამოხატავს, მათ შორის კი, ყველაზე უხეში და სიცრუეზე აგებული რიტორიკით ბალტიისპირეთისა და სკანდინავიის ქვეყნები გამოირჩევიან.

როგორც ირაკლი ზარქუამ აღნიშნა, გარკვეულმა ჯგუფებმა, რომლებიც მაშინ ბაიდენის ადმინისტრაციას იყვნენ ამოფარებულები, ახლა გადაინაცვლეს ბალტიისპირეთის მიმართულებით და უკვე ესენი აფინანსებენ ფონდებს.

„როგორც კი აშშ-ში მოვიდა ახალი ადმინისტრაცია, იქ უკვე საქართველოზე ძალადობა და ბულინგი შეწყდა. მაგრამ ვხედავთ, რომ ამ გარკვეულმა ჯგუფებმა, რომლებიც მაშინ ბაიდენის ადმინისტრაციას იყვნენ ამოფარებულები, ახლა გადაინაცვლეს ბალტიისპირეთის მიმართულებით და უკვე ესენი აფინანსებენ ფონდებს.

მათი ამოცანა სულ სხვაა, რომ ისევ და ისევ რამენაირად აქ მოახდინონ გადატრიალება, გაგვაშაონ, სანქციები დაგვიწესონ და შემდეგ აგენტურა დასვან აქ და აგენტურას მერე რასაც უნდა, იმას გააკეთებინებენ, რისი მცდელობაც არაერთხელ ჰქონდათ, - განაცხადა ირაკლი ზარქუამ.