მამუკა მდინარაძე: როგორც ფაშისტური რეჟიმი გასამართლდა ნიურნბერგის პროცესზე, ასე უნდა გასამართლდეს „ნაცმოძრაობის“ მთლიანი შემადგენლობა და ყველაფერს თავისი ობიექტური სახელი დაერქვას

„ეს არის საზოგადოების დაკვეთა და სახელის დარქმევის აუცილებლობა. როგორც ფაშისტური რეჟიმი გასამართლდა ნიურნბერგის პროცესზე, ასე უნდა გასამართლდეს ნაცმოძრაობის მთლიანი შემადგენლობა და ყველაფერს თავისი ობიექტური სახელი დაერქვას“, - განაცხადა „ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა და ფრაქცია “ქართული ოცნების“ თავმჯდომარემ მამუკა მდინარაძემ, პარლამენტში საგამოძიებო კომისიის შექმნასთან დაკავშირებით.

მისი თქმით, „ნაცმოძრაობის“ რეჟიმის სისასტიკე მას საკუთარ თავზე აქვს გამოცდილი. მამუკა მდინარაძის განცხადებით, უამრავი ადამიანია, ვინც სისხლიანი რეჟიმის ქმედებებზე სამართლებრივი სახელის დარქმევას ელის.

მამუკა მდინარაძეს მედიის წარმომადგენლებმა კომისიის დაკომპლექტებასთან დაკავშირებითაც დაუსვეს კითხვა.

„კომისიაში იმუშავებენ პარლამენტის წევრები, შეიძლება მოწვეული იყვნენ სპეციალისტებიც. კონკრეტულად, დღეს ცოტა გამიჭირდება საუბარია იმიტომ, რომ ჩვენ „ხალხის ძალის“ წარმომადგენლები გამოგვეყვნენ, მათ თქვეს, რომ გარკვეულ საკითხებთან დაკავშირებით აქვთ წინააღმდეგობა. იმ შემთხვევაში თუ პარლამენტის სხვა წევრები არ ინებებენ შემოსვლას, მაშინ ფორმალური და რეალური მხარე დაკმაყოფილებული იქნება და დაკომპლექტდება ისე როგორც არის არსებული კონფიგურაციით. თუ სხვები შემოვლენ, მაგალითად „ხალხის ძალას“ ექნება ერთი კვოტა და სხვა ოპოზიციურ წარმომადგენლებს სხვა კვოტები. თუ არა და მაშინ ხალხის ძალა აითვისებს იმ კვოტებს. დაკომპლექტდება ისე, რომ უმრავლესობის ნახევარი იყოს ოპოზიციის. რაც ყველაზე მთავარია, საზოგადოების ჩართულობა იქნება ამაში მაქსიმალური. იმიტომ, რომ ყველა დეტალს თვალყურს მიადევნებს საზოგადოება პირდაპირ ეთერში“, - განაცხადა მამუკა მდინარაძემ.

საქართველოს პარლამენტში საგაზაფხულო სესიის პირველივე კვირაში შეიქმნება 2003-12 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებითი საგამოძიებო კომისია.