მე-11 მოწვევის პარლამენტი მომდევნო კვირას საშემოდგომო სესიას გახსნის

მე-11 მოწვევის პარლამენტი მომდევნო კვირას საშემოდგომო სესიას გახსნის. რეგლამენტის თანახმად, საშემოდგომო სესია სექტემბრის პირველ სამშაბათს, 2 სექტემბერს გაიხსნება.

პირველი სექტემბრისთვის უკვე ჩანიშნულია საპროცედურო საკითხთა და წესების საპარლამენტო კომიტეტის, ასევე იურიდიულ საკითხთა კომიტეტისა და ბიუროს სხდომები.

საპროცედურო საკითხთა და წესების საპარლამენტო კომიტეტის სხდომაზე ანრი ოხანაშვილისათვის საქართველოს სახელმწიფო უსაფრთხოების სამსახურის უფროსის უფლებამოსილების ვადამდე შეწყვეტის საკითხს განიხილავენ. აღნიშნულ თანამდებობაზე მას საპარლამენტო უმრავლესობის ლიდერი, ფრაქცია „ქართული ოცნების“ თავმჯდომარე და პარტიის აღმასრულებელი მდივანი მამუკა მდინარაძე შეცვლის.

ამასთან, პირველი სექტემბრის სხდომაზე საპროცედური საკითხთა და წესების საპარლამენტო კომიტეტი გახარიას პარტიის წევრების ადგილმონაცვლეების საკითხს განიხილავს. კერძოდ, საქართველოს პარლამენტის გამოკლებული წევრის დიმიტრი ცქიტიშვილის ადგილმონაცვლის გელა აბულაძის პარლამენტის წევრის უფლებამოსილების ცნობის საკითხს. ასევე, ანა ბუჩუკურის ადგილმონაცვლე ჯემალ ანანიძე იქნება. ბექა ლილუაშვილს ქეთევან ბაკარაძე შეცვლის, ბერდია სიჭინავას რუსუდან თევზაძე, თეონა აქუბარდიას მალხაზ თორია, ნათია მეზვრიშვილს შალვა კერესელიძე, ლევან გოგიჩაიშვილს სალომე კობალაძე, გიორგი გახარიას გიგა ფარულავა, ზვიად ძიძიგურს ვიკა ფილფანი, როინ ქოჩორაშვილს გიორგი შარაშიძე, კახაბერ ქემოკლიძეს თამარ ხვედელიანი, ზაზა თავაძის ადგილმონაცვლე კი სოფიო ხორგუანი იქნება.

გახარიას პარტიის 12 წევრისთვის სადეპუტატო უფლებამოსილების ვადამდე შეწყვეტის საფუძველი საქართველოს პარლამენტის სხდომების არასაპატიო მიზეზით გაცდენა გახდა.

რეგლამენტის მიხედვით, საშემოდგომო სესია დეკემბრის მესამე პარასკევს იხურება.