სტიქია დასავლეთ საქართველოში - სოფელ ჩოჩხათიდან რამდენიმე ოჯახი სამაშველო სამსახურმა უსაფრთხო ადგილას გადაიყვანა

დასავლეთ საქართველოში სტიქიას ებრძვიან.

ლანჩხუთის მუნიციპალიტეტში რამდენიმედღიანმა უხვმა ნალექმა პრობლემები შექმნა. დაზიანებულია ინფრასტრუქტურის ნაწილი, დატბორილია საყანე ფართობები, დაზიანებული და დატბორილია საცხოვრებელი სახლები.

სოფელ ჩოჩხათში მოსულმა უხვმა ნალექმა ადგილობრივ მოსახლეობას პრობლემები შეუქმნა. რამდენიმე ოჯახი სამაშველო სამსახურმა უსაფრთხო ადგილას გადაიყვანა.

სტიქიას ებრძვიან ფოთშიც. სტიქიის გამო, სკოლებსა და ბაღებში სასწავლო პროცესი შეჩერდა - დატბორილი გზები აფერხებს დაწესებულებების ფუნქციონირებას. ქალაქი მესამე დღეა სტიქიას ებრძვის.

„ძლიერმა ნალექმა ლანჩხუთის მუნიციპალიტეტში პრობლემები შექმნა.დაზიანებულია ინფრასტრუქტურის ნაწილი, დატბორილია საყანე ფართობები, დაზიანებული და დატბორილია საცხოვრებელი სახლები.

მერიაში შექმნილია საგანგებო შტაბი, ყველა სამსახური ჩართულია და მობილიზებულია მოსახლეობის დასახმარებლად.

ჩოჩხათის, სუფსისა და ღრმაღელის ადმინისტრაციულ ერთეულებში ლანჩხუთის მერი ალექსანდრე სარიშვილი მოადგილე თორნიკე ტიკაძესთან ერთად იმყოფებოდა, მოსახლეობას შეხვდა და ადგილზე დაათვალიერა სტიქიისაგან მიყენებული ზარალი.

რამდენიმე სოფელში ჩამოწოლილია მეწყერი და დაწყებულია აღდგენითი სამუშაოები, რომელიც მომდევნო დღეებშიც გაგრძელდება“, - ნათქვამია მერიის მიერ გავრცელებულ ინფორმაციაში.