32-მდე გაიზარდა საბერძნეთში მატარებლების შეჯახების შედეგად დაღუპულთა რიცხვი

საბერძნეთის სამაშველო სამსახურის ინფორმაციით, 32-მდე გაიზარდა სარკინიგზო კატასტროფის შედეგად დაღუპულთა რიცხვი.

მანამდე დადასტურებული იყო 26 ადამიანის სიკვდილი. დაშავდა - 85.

28 თებერვალს, ღამით, ქალაქ ლარისასთან ერთმანეთს შეეჯახნენ ათენიდან სალონიკისკენ მიმავალი სამგზავრო მატარებელი, რომელშიც 350-მდე ადამიანი იმყოფებოდა და სალონიკიდან ლარისაში მიმავალი სატვირთო მატარებელი. ისინი ერთმანეთის პირისპირ ერთ ლიანდაგზე აღმოჩნდნენ. საბერძნეთის მედიასაშუალებები პოლიციაზე დაყრდნობით წერენ, რომ დაწყებული გამოძიების ფარგლებში ბრალი უკვე წაუყენეს სარკინიგზო სადგურის უფროსს.

შეჯახების შედეგად სამგზავრო მატარებლის ოთხი ვაგონი რელსებიდან გადავარდა და ერთს ცეცხლი გაუჩნდა. თესალიის რეგიონის გუბერნატორმა კონსტანტინოს აგორასტოსმა ჟურნალისტებს უთხრა, რომ ორი ვაგონი თითქმის მთლიანად განადგურებულია.

ცეცხლს 150-მდე მეხანძრე აქრობდა. ადგილობრივი ხელისუფლების ინფორმაციით, სამაშველო ოპერაციაში ჩართული იყო პოლიციის 15 ეკიპაჟიც და გადაუდებელი სამედიცინო დახმარების 40 ბრიგადა. მატარებლის ის მგზავრები, რომლებიც კატასტროფას გადაურჩნენ და არც სამედიცინო დახმარება დასჭირდათ, სალონიკამდე ავტობუსებით ჩაიყვანეს.

ამავე თემაზე:

* დაიღუპა 26 და დაშავდა ათობით ადამიანი - საბერძნეთში სამგზავრო და სატვირთო მატარებლები შეეჯახნენ