საბერძნეთში გლოვა გამოცხადდა

საბერძნეთში 38-მდე გაიზარდა ქვეყნის ცენტრალურ ნაწილში მომხდარი სარკინიგზო კატასტროფის შედეგად დაღუპულთა რიცხვი. ჰოსპიტლებში რჩება 66 დაშავებული, მათგან 6 რეანიმაციაშია.

ვარაუდობენ, რომ დაღუპულთა რიცხვი კიდევ გაიზრდება, რადგან კატასტროფის რაიონში, ქალაქ ლარისასთან სამძებრო-სამაშველო ოპერაცია ჯერ არ დასრულებულა.

საბერძნეთის პრემიერ-მინისტრმა კირიაკოს მიცოტაკისმა 1-3 მარტი გლოვის დღეებად გამოაცხადა.

მიცოტაკისი კატასტროფის რაიონში გაემგზავრა.

საბერძნეთს სამძიმარი გამოაცხადეს ევროკავშირის წევრი სახელმწიფოების ლიდერებმა და თურქეთმა.

28 თებერვალს, ღამით, ქალაქ ლარისასთან ერთმანეთს შეეჯახნენ ათენიდან სალონიკისკენ მიმავალი სამგზავრო მატარებელი და სალონიკიდან ლარისაში მიმავალი სატვირთო მატარებელი. ისინი ერთმანეთის პირისპირ ერთ ლიანდაგზე აღმოჩნდნენ. საბერძნეთის რკინიგზის კომპანიის ინფორმაციით, სამგზავრო მატარებელში იმყოფებოდა 342 მგზავრი და კომპანიის 12 თანამშრომელი.

საბერძნეთის მედიასაშუალებები პოლიციაზე დაყრდნობით წერენ, რომ დაწყებული გამოძიების ფარგლებში ბრალი უკვე წაუყენეს სარკინიგზო სადგურის უფროსს.

შეჯახების შედეგად სამგზავრო მატარებლის ოთხი ვაგონი რელსებიდან გადავარდა და ერთს ცეცხლი გაუჩნდა. თესალიის რეგიონის გუბერნატორმა კონსტანტინოს აგორასტოსმა ჟურნალისტებს უთხრა, რომ ორი ვაგონი თითქმის მთლიანად განადგურდა. ცეცხლს 150-მდე მეხანძრე აქრობდა.

ადგილობრივი ხელისუფლების ინფორმაციით, სამაშველო-სამძებრო ოპერაციაში 150 მაშველთან ერთან პოლიციელებიც მონაწილეობენ. 200-ზე მეტი ადამიანი, რომლებიც კატასტროფას გადაურჩნენ და არც სამედიცინო დახმარება დასჭირდათ, სალონიკამდე ავტობუსებით ჩაიყვანეს.

ასევე დაგაინტერესებთ:

* “საუკუნის გარიგებაა, ისევე როგორც თავის დროზე, დიეგოს შემთხვევაში მოხდა, რომელშიც ნაპოლიმ 13 მილიარდი ძველი ლირა გადაიხადა” - რას ამბობს იტალიელი ჟურნალისტი კვარაცხელიას შესახებ

* დომენიკ მანგო: თავად ინგა გრიგოლიას შვილიშვილი რომ ბერას მონათლულია, ამის ბედნიერება აქვთ სხვა ბავშვებს?! - როცა ამ თემას გაიხსენებ, მაშინ იტყვის შვილი რა შუაშიაო