„არ მეჩვენებოდა და "თბილისო, მზის და ვარდების მხარეო" – აშკარად მესმოდა“ - ემიგრაციის ნარატივი

ხათუნა ბოლაშვილის ემიგრანტ ქალთა ნარატივი. 

იტალიის საემიგრაციო საზოგადოება ხათუნა ბოლაშვილს დიდი ხანია იცნობს, რადგან მისი ემიგრაცია საკმაოდ ხანგრძლივ პერიოდს ითვლის. დღეს ხათუნა ბოლაშვილი ერთ-ერთი წარმატებული და ემიგრაციის გამოწვევებზე გამარჯვებული ადამიანია. ის ქართულ-იტალიური ორგანიზაცია, GeoHouse Georgia-ს დამფუძნებელია და წლებია მას წარმატებით ხელმძღვანელობს. 

გარდა იმისა, რომ ხათუნა ბოლაშვილი ემიგრანტებისთვის საჭირო და მნიშვნელოვან საკითხებზე მუშაობს, მას კალამიც ისევე მხატვრულ ლიტერატურულად უჭრის, როგორ წარმატებასაც თავის საქმეში მიაღწია. ჩვენს მკითხველს ვთავაზობთ ხათუნას საჯარო და ემოციურ პოსტს ემიგრანტ ქალებზე.

#ყველაადამიანშიარისმზე #გმირიქალები

როცა ჩემოდანს ჩაალაგებ და წახვალ სადღაც ქვეყანაში, მაშინ არ იცი, რომ ჩემოდანში საჭირო ნივთებთან ერთად, შენი თავის ნამდვილ ვერსიას უნებურად კეცავ და სადღაც კუნჭულში მალავ. მერე იწყება ახალი ცხოვრება, ახალი გარემო.. ახალი ადამიანები. იწყება ბრძოლები... გადაფასებები... ხიდჩატეხილობა....
ყველაფერი ეს ინდივიდუალურია და ყველა ჩვენებურად ვიტანთ... ეს სხვა თემაა და დღეს ამაზე არ ვლაპარაკობთ..
დღეს სხვა ამბავი უნდა მოვყვე... ანუ ისეთ დღეებზე უნდა მოგიყვეთ, ჩემოდანში ჩაკეცილ საკუთარ თავს რომ ამოასკუპებ, მოკალათდები და ისე რომ ხარ, როგორც თევზი წყალში...
ასეთი დღე იყო გუშინ....

სტუმრად მისულს ძალიან კარგი გოგოს საქორწინო ცერემონიალზე, დამხვდა ლამაზი გარემო, ლამაზი საზოგადოება და ჩვენი ლამაზი გოგოები  - ელეგანტურები, მოპრანჭულები...– ჰოდა აი ჩემოდანში ჩაკეცილ საკუთარი თავის ვერსიაზე რომ ვიძახდი, არავის არ დაზარებია იმ ვერსიის მორგება საბედნიეროდ...
ბრჭყვიალა და პომპეზურ გარემოს კიდევ უფრო ალამაზებდა როიალის სასიამოვნო მელოდიები.... არ მეჩვენებოდა და.... "თბილისო, მზის და ვარდების მხარეო" – აშკარად მესმოდა....

არც ეკა მელითაური მეჩვენებოდა როიალთან..... არც მისი მაღალი პროფესიონალური დონის შესრულება და.... არც აღფრთოვანებული იტალიელი სტუმრები...
ამ დროს ხომ მე ინდიურის სინდრომი მიჩნდება და ვიფხორები, როცა ჩემს "ცა–ფირუზ–ხმელეთს" ასე ლამაზად ვაწვდით ხოლმე უცხოელებს... (ვერ მოვიშალე სამშობლოთი მარიაჟობა ვერაა) .... ეკა კი უკრავდა.... ლამაზად... გულით... სიყვარულით....

მერე კიდევ, როკენროლი იცეკვა ისევე პროფესიონალურად და... როცა შენს პრაქტიკაზე ვმუშაობდი ეკა, აბა საიდან უნდა მცოდნოდა , რეები შეგძლებია თურმე.... არც იმათმა იციან, ვის ოჯახშიც ზრუნავ მოხუცებულზე.... არც იმათმა იციან, ანაბეჭდებს რომ გიღებენ, ბინადრობის უფლება რომ მოგცენ....
არავინ არ ვიცით არაფერი, როცა ადამიანს ველაპარაკებით, რამხელა რესურსი და პოტენციალი შეიძლება იდგეს ჩვენს წინ....
ან საიდან უნდა ვიცოდეთ, როცა სადღაც ჩემოდანში ვტოვებთ საკუთარი თავის საუკეთესო ვერსიას და... დინებას მიყოლებულები ვცხოვრობთ....

ალბათ რამდენი ასეთი რესურსია ყოველდღიურად ჩვენს გარშემო ...

მადლობა ჩემო ეკა, ... აღარ დაბრუნდე ჩემოდანში - წერს ხათუნა ბოლაშვილი.