"ბადანტემ" ოჯახიდან 250 000 ევროს ღირებულების სამკაულები გაიტაცა და საკუთარ ქვეყანაში დაბრუნება სცადა

შემთხვევა იტალიაში, ტრენტოში მოხდა. ბრაზილიელი "ბადანტე" ოჯახში, ოთხი წლის განმავლობაში ცხოვრობდა და მუშაობდა. მოხუცის ოჯახმა, იგი როგორც საკუთარი ოჯახის წევრი, ისე მიიღო. განგაში "ბადანტის" ბოლო სამუშაო დღის შემდეგ ატყდა. ადგილობრივმა პოლიციამ, სასწრაფოდ საქმის კურსში ჩააყენა, სამართალდამცველები ქვეყნის მასშტაბით.

მოხუცმა ქალბატონმა, რომელსაც ბრაზილიელი "ბადანტე" უვლიდა, დილით შეამჩნია, რომ ოქროს სამაჯური, რომელსაც მუდმივად ატარებდა, ადგილზე აღარ იყო. ქალმა მაშინვე დანარჩენი ოქროულის ძებნა დაიწყო, მაგრამ ადგილზე აღარაფერი დახვდა. ჯამში, 250 000 ევროს ღირებულების სამკაული იყო გამქრალი.

ადგილზე მისულმა კარაბინერებმა შეამოწმეს მოხუცის მობილური ტელეფონიც, სადაც მომვლელის მესიჯები აღმოაჩინეს, რომელიც მოხუცს წერდა, რომ შუადღის ორი საათისთვის გამოსამშვიდობებლად მივიდოდა, მაგრამ სამართალდამცველები მაშინვე მიხვდნენ, რომ ქალს ეს დროის მოსაგებად სჭირდებოდა.

მყისიერმა მოქმედებამ შედეგი გამოიღო. ბრაზილიელი მომვლელი მილანის მალპენზას აეროპორტში დააკავეს, ის იტალიის დატოვებას და ბრაზილიაში დაბრუნებას ცდილობდა, მას თან ჰქონდა სამი ჩემოდანი, რომელშიც ნაქურდალი ნივთებიც აღმოუჩინეს. ქალის წინააღმდეგ საქმე აღიძრა.