განგაშის სიგნალი იტალიაში - სისტემა შემუშავებულია საგანგებო სიტუაციების მოსაგვარებლად როგორიცაა მიწისძვრები, ცუნამი, ბირთვული ავარიები ან რადიოლოგიური საგანგებო სიტუაციები, ინტენსიური ნალექი და ა.შ.

იტალიის სამოქალაქო დაცვის დეპარტამენტმა დღეს პულიის, პიემონტისა და უმბრიის მოსახლეობას მობილურ ტელეფონებზე განგაშის სიგნალი გაუგზავნა.

მიღებული განგაშის სიგნალის შემდეგ Exclusivetv-ს არაერთი ემიგრანტი დაუკავშირდა. ჩვენს მიერ მოპოვებული ინფორმაციით იტალია ტესტავს პროგრამას „IT-alert“ (იტ-გაფრთხილება).

„IT-Alert“ არის სისტემა, რომელიც იტალიის სამოქალაქო დაცვის დეპარტამენტმა აამოქმედა რათა საგანგებო სიტუაციების შემთხვევაში ოპერატიულად გააფრთხილოს კონკრეტული ტერიტორიის მოსახლეობა ხმოვანი განგაშის ტექსტური შეტყობინების საშუალებით . IT-Alert ტესტირების ეტაპი 28 ივნისს ტოსკანიდან დაიწყო და თანდათან გავრცელდება იტალიის ყველა რეგიონში. ტესტირების ეტაპი  2024 წლის თებერვალში დასრულდება.

„სისტემა შემუშავებულია საგანგებო სიტუაციების მოსაგვარებლად, რომლებსაც შეუძლიათ გავლენა მოახდინონ ჩვენს ქვეყანაზე“, - წერია ოფიციალურ ინფორმაციაში, - როგორიცაა მიწისძვრები, ცუნამი, ბირთვული ავარიები ან რადიოლოგიური საგანგებო სიტუაციები, ინტენსიური ნალექი და ა.შ.

როგორც „IT-alert“-ის ოფიციალურ გვერდზე წერია, შეტყობინებების მიღება საკმარისი არ არის, უნდა გადახვიდეთ მითითებულ ბმულზე შეავსოთ კითხვარი იმ ტერიტორიის რისკების შესახებ, სადაც ცხოვრობთ, მუშაობთ ან მოგზაურობთ, რათა ოპერატიულად მიიღოთ შესაბამისი ზომები.

ხათუნა შარაძე

ExclusiveTV იტალია